غیر قانونی طور تے رہݨ آلیں کوں ملک بدر کرݨ دا اڄوکا فیصلہ سارے غیر ملکیاں دے خلاف اے، پاکستان اچ افغان مہاجرین دے حوالے نال قومی پالیسی اچ کوئی تبدیلی کائنی تھئی ، دفتر خارجہ دی ترجمان ممتاز زہرہ بلوچ دی پریس بریفنگ

اسلام آباد۔5اکتوبر(اے پی پی) پاکستان آکھیے جو غیر قانونی طور تے رہݨ آلے لوکاں کوں ملک بدر کرݨ دا اڄوکا فیصلہ افغان مہاجرین کوں نشانہ بݨاوݨ کیتے نی بلکہ او انہاں سارے غیر ملکیاں دے خلاف اے جنھاں کنے ویزا دستاویزات کائنی۔ دفتر خارجہ دی ترجمان ممتاز زہرہ بلوچ پریس بریفنگ اچ آکھیے جو پاکستان اچ افغان مہاجرین دے حوالے نال قومی پالیسی اچ کوئی تبدیلی کائنی تھئی تے انہاں دی محفوظ واپسی ھک انڄ مسئلہ اے ۔ ترجمان آکھیے جاری آپریشن انہاں لوکاں دے خلاف اے جنہاں یا تاں آپݨے ویزے توں ودھ قیام کیتے یا انہاں کنے رہݨ سانڳے صحیح دستاویزات کائنی ۔ انہاں واضح کیتے جو ایں آپریشن دا انہاں افغان مہاجرین نال کوئی تعلق کائنی جنہاں دی پاکستان معاشی مجبوریاں دے باوجود کئی ݙھاکیں توں میزبانی کریندا پئے ۔ انہاں آکھیے پاکستان تے افغانستان وچال ݙوپاسے تجارت جاری اے تاں جو انہاں ایں ڳالھ تے زور ݙتے جو پاکستان ٹرانزٹ ٹریڈ دی سہولیات دے غلط استعمال کوں قبول نہ کریسی ۔ انہاں آکھیے پاکستان واضح طور تے افغانستان توں لاحق خطرات بارے آپݨے تحفظات دا اظہار کریندا رہیے۔  انہاں آکھیے اساں سفارت کاری تے یقین رکھیندوں تے افغان حکام نال ڳالھ مہاڑ جاری رکھیسوں جݙاں جو ایں ڳالھ کوں یقینی بݨایا ونڄ سڳے جو افغان سرزمین دہشت گردی کوں ہوا ݙیوݨ سانڳے استعمال نہ تھیوے۔ ترجمان آکھیے پاکستان بھارتی حکام نال رابطے وچ ہے تے انہاں تے زور ݙتا ڳئے جو او پاکستانی صحافیاں اتے تماشائیاں کوں ویزا جاری کرن جیڑھے بھارت اچ آئی سی سی ورلڈ کپ ݙیکھݨ چاہندن ۔ انہاں آکھیے اے میزبان ملک دی ذمہ واری اے جو او پاکستان کرکٹ ٹیم کوں سکیورٹی اتے سازگار ماحول ݙیوے، ترجمان ایں ڳالھ تے زور ݙتے جو کھیݙاں کوں سیاست نال نہ رلایا ونڄے ۔ انہاں آکھیے پاکستانی ٹیم ݙو طرفہ کرکٹ سیریز سانڳے بھارت دا دورہ نی کریندی پئی تے اینکوں بین الاقوامی سیریز اچ شرکت دا پورا حق حاصل اے۔ ھک ٻئے سوال دے جواب اچ ترجمان آکھیے وزارت خارجہ کوں الیکشن کمیشن دی طرفوں آندے عام انتخابات کیتے بین الاقوامی مبصرین کوں سݙݨ دا باضابطہ پیغام ملیے ۔ انہاں آکھیے ایں عمل کوں پالیسی تے ماضی دے طرز عمل دے مطابق سوکھا بݨایا ویسی ۔