معیاری تعلیم ملکی ترقی دی بنیادی لوڑھ اے۔ صدر مملکت ڈاکٹر عارف علوی دا قائداعظم یونیورسٹی دے کانووکیشن دی تقریب توں خطاب

اسلام آباد۔12اکتوبر  (اے پی پی) صدر مملکت ڈاکٹر عارف علوی آکھیا جو معیاری تعلیم ملکی ترقی دی بنیادی لوڑھ اے۔ وزارت تعلیم اتے ہائر ایجوکیشن کمیشن مارکیٹ اچ ملازمتاں دی منڳ دے مطابق کورسز اتے شعبیاں کوں ڈیزائن کرݨ اچ یونیورسٹیاں دی مدد کرن۔ او قائداعظم یونیورسٹی دے کانووکیشن دی تقریب توں خطاب کریندے پئے ہن۔ صدر مملکت ڈاکٹر عارف علوی آکھیا جو پاکستان اوکھے معاشی حالات توں لنڳھدا پئے پر امید اے جو معیاری تعلیم،قانون دی حکمرانی اتے انصاف کوں یقینی ٻݨا تے جلدی ولا عروج حاصل کریسی۔ پاکستان ترقی کرݨ دی پوری صلاحیت رکھیندے۔ تقریب اچ صدرمملکت  یونیورسٹی دے مختلف شعبیاں اچ ٹاپ پوزیشن ہولڈرز کوں میڈلز اتے کامیاب طلباء کوں ڈگریاں ݙتی۔ وائس چانسلر قائداعظم یونیورسٹی پروفیسر ڈاکٹر نیاز احمد اختر ݙسیا جو کانووکیشن اچ کل 7738 بی ایس، ایم ایس، ایم فل اتے پی ایچ ڈی طلباء کوں ڈگریاں ݙتی ڳئن۔ انہاں ݙسیا جو ایں ویلھے یونیورسٹی اچ 14 ارب روپے دے ترقیاتی منصوبے چین دے تعاون نال جاری ہن۔