حلقہ بندیاں دا مرحلہ مکمل تھیوݨ دے بعد انتخابات دی حتمی تاریخ دا اعلان تھیسی ، ریڈیو پاکستان دی بحالی دی پوری کوشش کریسوں ،نگران وفاقی وزیراطلاعات مرتضی سولنگی

لاہور۔13اکتوبر(اے پی پی) نگران وفاقی وزیر اطلاعات و نشریات مرتضی سولنگی آکھیے حلقہ بندیاں دا مرحلہ مکمل تھیوݨ دے بعد انتخابات دی حتمی تاریخ دا اعلان تھیسی۔ ، امید اے  جنوری 2024دے چھیکڑ تئیں انتخابات تھی ویسن ، مستقل پالیسیاں بݨاوݨ دا اختیار منتخب حکومتاں کنے ہے، ریڈیو پاکستان دی بحالی دی پوری کوشش کریسوں ۔ اے ڳالھ انہاں جمعہ کوں ریڈیو پاکستان دے نیوز اینڈ کرنٹ افیئرز دے پروگرام لاہور ان سائیٹ اچ آکھی اے ۔ نگران وفاقی وزیر اطلاعات آکھیے الیکشن کمیشن جنوری دے چھیکڑی ہفتے اچ الیکشن دی تاریخ ݙتی اے 30 نومبر کوں حلقہ بندیاں دی حتمی فہرست شائع کرݙتی ویسی ، جݙاں جو حلقہ بندیاں دا مرحلہ مکمل تھی ویسی تاں الیکشن دی حتمی تاریخ دا اعلان تھیسی کیوں جو جݙاں تئیں حلقہ بندیاں مکمل نی تھیندیاں تاں ایں توں پہلے تاریخ ݙیوݨ دا کوئی فیدہ کائنی ۔ انہاں آکھیے الیکشن ایکٹ 2017 اچ واضح لکھیے جو الیکشن توں پہلے ساریاں سیاسی جماعتاں کوں لیکشن مہم سانڳے گھٹ توں گھٹ 54 ݙینھ ݙتے ویسن جیڑھے جو تقریبا ݙو مہینے بݨدن ، میکوں یقین اے جو جنوری دے چھیکڑی ہفتے انتخابات تھیسن ۔ ھک سوال دے جواب اچ انہاں آکھیے پاکستان براڈ کاسٹنگ کارپوریشن عالمی معیار دا ادارہ اے جیڑھا پیشہ ورانہ طریقے نال آپݨی خدمات انجام ݙیندا پئے ۔ انہاں آکھیے ریڈیو پاکستان کوں جدید تقاضیں نال جوڑݨ دی لوڑھ اے ۔ انہاں آکھیے نگران حکومت دے اختیارات محدود ہن، وݙے تے پالیسی فیصلے کرݨ دا اختیار منتخب حکومت کنے ہے۔ انہاں آکھیے جݙاں ریڈیو پاکستان ڈیجیٹل براڈ کاسٹنگ نال جڑ ویسی تاں ایں نظام توں بجلی دی وی بچت تھیسی ۔ انہاں آکھیے امید اے منتخب حکومت آوݨ دے بعد ایں کم کوں اڳوں ودھایا ویسی ۔ انہاں آکھیے امید اے آندی منتخب حکومت ریڈیو پاکستان سودھے ٻئے ریاستی نشریاتی اداریں دی جدت سانڳے آپݨیاں کوششاں بروئے کار گھن آسی۔