اسرائیل  دا غزہ اچ ہسپتال تے حملہ بین الاقوامی انسانی قانون دی خلاف ورزی اے، جلیل عباس جیلانی

اسلام آباد۔18اکتوبر(اے پی پی):وزیر خارجہ جلیل عباس جیلانی غزہ دے الاہلی باپسٹ ہسپتال تے اسرائیلی حملے تے سخت ردعمل ݙیندے ہوئیں آکھیے جو اے ڳالھ واضح ہے جو اسرائیل دی طرفوں غزہ اچ ہسپتال تےݙراوݨا حملہ آپݨے دفاع دا عمل کائنی ۔آپݨے ھک ٹویٹ اچ انہاں آکھیے جو اے حملہ بین الاقوامی انسانی قانون دی خلاف ورزی اے جیں اچ نشوم ٻال ،تریمتاں ، ڈاکٹر، طبی عملے اتے پناہ دے متلاشی بے گھر شہریاں کوں نشانہ بݨایا ڳئے ۔ اے امر قابل ذکر اے جو وزیر خارجہ جلیل عباس جیلانی او آئی سی دی ایگزیکٹو کمیٹی دے غیر معمولی اجلاس اچ شرکت سانڳے سعودی عرب دے شہر جدہ وچ ہن جیں دا مقصد غزہ دے بحران اتے اتھاں محصور شہریاں دی انسانی صورتحال دا جائزہ گھنݨا اے ۔اے  اجلاس پاکستان اتے سعودی عرب سانجھے طور تے سݙیے ۔ ایندے توں پہلے وزیر خارجہ او آئی سی ملکاں دے آپݨے ہم منصباں جیں اچ مصر، ایران، ترکیہ اتے متحدہ عرب امارات دے وزرائے خارجہ شامل ہن، نال ٹیلی فون تے ڳالھ مہاڑ کیتی ہئی۔