بیلٹ اینڈ روڈ منصوبہ دنیا کوں پیش آندے چیلنج نال نبݨݨ دا بہترین ذریعہ اے، دنیا دی کوئی طاقت پاکستان چین تعلقات اچ دراڑاں دی نی پاسڳدی ، نگراں وزیراعظم انوارالحق کاکڑ دی چین دے صدر شی جن پنگ نال ملاقات اچ ڳالھ مہاڑ

بیجنگ۔19اکتوبر(اے پی پی):نگراں وزیراعظم انوارالحق کاکڑآکھیے بیلٹ اینڈ روڈ منصوبہ دنیا کوں پیش آندے چیلنج نال نبݨݨ دا بہترین ذریعہ اے ، چین پاکستان دا تزویراتی شراکت دار اے، پاکستان کوں چین دی یاری تے فخر اے ، دنیا دی کوئی طاقت پاکستان چین تعلقات اچ دراڑاں نی پا سڳدی ، اپݨی ݙوطرفہ سٹریٹجک شراکت داری کوں ضیان نہ پڄݨ ݙیسوں ۔ اے ڳالھ انہاں چین دے صدر شی جن پنگ نال ملاقات اچ آکھی اے ۔ وزیراعظم آکھیے صدر شی جن پنگ دی طرفوں بیلٹ اینڈ روڈ دے اہم اتے تاریخی فورم اچ سݙݨ تے شکرگزار ہیسے تے انہاں دے وژن بی آر آئی دے حوالے نال بیلٹ اینڈ روڈ فورم دی بھرپور کامیابی تے مبارخ ݙیندوں ۔ فورم دی افتتاحی تقریب اچ چین دے صدر دا خطاب انہاں دے عظیم وژن دی عکاس ہئی تے ایندے اچ پاکستان جیہے ملکاں کیتے ٻہوں موقع ہن ، پاکستان تے چین دی یاری ماکھی توں مٹھی تے ݙوہیں ملک پکے یار ہن تے اے پاکستان کیتے ٻہوں اہم لمحات ہن جو او انہاں موقع توں فیدہ چاوے۔ انہاں آکھیے چین دے صدر دا رابطے ودھاوݨ دے حوالے نال وژن اتے آپݨے خطاب اچ جیڑھیاں اٹھ تجویزاں ݙتیاں ڳئن او حقیقت اچ عملی طور تے رابطے ودھاوݨ دا روڈمیپ ہن بلکہ بین الاقوامی نظام ماچ استحکام دا اہم عنصر اے۔ وزیراعظم آکھیے سیاسی، اقتصادی، سماجی اتے تہذیبی چیلنج دا اڄ دنیا دے ٻہوں سارے ملکاں کوں سامݨا اے ، انہاں دا لمبی د تے گہرائی نال جواب درکار اے جݙاں جو بی آر آئی تے چین دے صدر دا وژن انہاں دے چیلنج دا حقیقت پسندانہ تے عملی حل اے۔ وزیراعظم آکھیے چین ملک اچ جیڑھا نظام تے جیویں جدیدیت متعارف کرائی اے، او اساں کیتے ھک رول ماڈل اے تے اساں کیتے ھک سبق اے جݙاں کوئی ملک تے قوم ترقی دا عزم کر گھنے تاں اے انسانی تاریخ اچ ھک مثال دی حیثیت رکھیندی اے تے چین دے سوال ایجھی ترقی کتھائیں نظر نی آندی ، بیلٹ اینڈ روڈ منصوبہ چیلنج نال نبݨݨ دا بہترین ذریعہ اے، چین دی ترقی ساریں کیتے بہترین مثال اے۔ انہاں آکھیے پاکستان تبت، سنکیانگ سودھے ون چائینہ پالیسی دی حمایت کریندے ، میں ارومچی وی ویندا پیاں، اساں ہمیشہ چین دے نال کھڑسوں ، پاکستان اچ مختلف سیاسی نظریات دے باوجود پاک چین دوستی دے حوالے نال کوئی وی اختلافی نکتہ نظر کائنی ، چین پاکستان دا تکڑا شراکت دار اے اتے اساں فطری ہمسائے ہیسے، ݙہیں ملک ھک ݙوجھے تے بھرپور اعتماد کریندن ، چین  نال تعلقات تے پاکستان اچ کہیں قسم دا کوئی شک تے شبہ اتے ابہام نی پاتا ویندا ، اساں چین اتے چینی قیادت تے مکمل اعتماد رکھیندوں ۔ وزیراعظم آکھیے مشترکہ مستقبل متعلق چین دے صدر دے وژن موجب عالمی ترقی دے اقدام، عالمی سکیورٹی اتے عالمی ثقافت متعلق اقدام موجودہ اوکھے حالات اچ ٻہوں چنڳاں اے ، پاکستان ݙوہیں ملکاں دی سٹریٹجک شراکت داری کوں ضیان نہ پڄݨ ݙیسی ، اساں صرف زبانی کلامی نی آپݨے عمل نال اے ڳالھ ثابت کریسوں ، چین نال آپݨے تعلقات دے معاملے تے پاکستان ھک انچ وی پچھوں نہ ہٹسی ۔ ایں موقع تے چین دے صدر شی جن پنگ آکھیے جو چین پاکستان نال مختلف شعبیں اچ تعلقات ودھاوݨ چاہندے ، سی پیک پاکستان اتے چین دے تکڑے تعلقات دا عکاس اے۔