اسلام آباد۔20اکتوبر(اے پی پی) سرائیکی ناول نگار مسرت کلانچوی اے پی پی سرائیکی نیوز سروس نال ڳالھ مہاڑ کریندے ہوئیں آکھیے جو جئیں ویلھے میں سٹوڈنٹ ہوندی ہم اوں ویلھے وی سرائیکی لٹریچر تے کم تھیندا پیا ہئی تے ہݨ وی ٻہوں زیادہ کم تھی چکیے۔ انہاں آکھیے میں جݙاں 11 ویں جماعت اچ پڑھدی ہامی اوں ویلھے سرائیکی اچ لکھݨ شروع کیتا اتے میݙے والد دلشاد کلانچوی میکوں آکھیا جو تساں اردو وچ وی لکھو اتے امروز اخبار اچ میݙی ھک کہانی چپھی۔ اوں ویلھے میں آپݨے والد کوں آکھیا جو اساں آپݨی زبان دی خدمت نہ کریسوں تاں ٻیا کون کریسی۔انہاں آکھیے اوں توں بعد میں سرائیکی افسانے لکھݨ شروع کیتے میݙے نال اوں ویلھے ٻیاں وی تریمتاں ہن جیندے اچ بتول رحمانی ، شیما سیال، پروین عزیز، شاہین ڈیروی، صفیہ قریشی ہن میݙے نال لکھدیاں پیاں ہن۔ایندے نال مرد حضرات وی لکھدے پئے ہن ظفرلاشاری دا ناول اوں ویلھے آچکیا ہئی۔ انہاں آکھیے میکوں اے اعزاز ملیے جو سرائیکی اچ ساریں توں پہلا افسانیاں دا مجموعہ میݙا چھپیے جئیں دا ناں “اچی دھرتی جھکا اسمان” ہئی۔ انہاں آکھیے میں سمجھدی ہاں جتنا ٻیاں زباناں اتے کم تھیندا پئے اتنا سرائیکی وچ وی تھیندا پئے، پر ایندے اچ میگزین زیادہ کائنی میں ایندی کمی محسوس کریندی ہاں، میگزین تے اخبار زیادہ ہووݨے چاہیدن، انہاں آکھیے سرائیکی اخبار “جھوک ” ملتان توں چھپدا پئے ایندے نال ٻئے اخبار وی ہووݨے چاہیدن۔
