ملک اچ 90 ݙینھ اچ عام انتخابات کراوݨ سانڳے درخواستاں تے وفاق اتے الیکشن کمیشن کوں نوٹس جاری، کیس دی سماعت 2 نومبر تئیں ملتوی

اسلام آباد۔23اکتوبر  (اے پی پی):سپریم کورٹ ملک اچ 90 ݙینھ اچ عام انتخابات کراوݨ سانڳے دائر درخواستاں تے وفاق اتے الیکشن کمیشن کوں نوٹس جاری کریندے ہوئیں کیس دی سماعت 2 نومبر 2023 تئیں  ملتوی کرݙتی ۔ چیف جسٹس آف پاکستان جسٹس قاضی فائز عیسیٰ دی سربراہی اچ عدالت عظمیٰ دے ترائے رکنی بینچ درخواستاں تے سماعت کیتی۔  سماعت دے موقع تے سپریم کورٹ بار ایسوسی ایشن دے صدر عابد زبیری اتے ٻئے درخواستگزاراں دے وکلاء دلائل ݙتن، واضح رہے جو ملک اچ 90 ݙینھ اچ عام انتخابات کراوݨ کیتے سپریم کورٹ بار ایسوسی ایشن اتے پی ٹی آئی سودھے ٻئے لوکاں درخواستاں دائر کر رکھئن ۔سنوار کوں ملک اچ عام انتحابات دے حوالے نال دائر درخواستاں تے باقاعدہ پہلی سماعت کیتی ڳئی ۔ بعد اچ درخواستگزاراں دے وکلاء دے دلائل سݨݨ دے بعد سپریم کورٹ وفاق اتے الیکشن کمیشن کوں نوٹس جاری کریندے ہوئیں کیس دی آندی سماعت ݙو نومبر 2023 تئیں ملتوی کرݙتی۔