گیس دیاں قیمتاں ودھݨ دے بعد پٹرولیم سیکٹر دا گردشی قرضہ مک ویسی ، روس توں سالانہ 90  لکھ میٹرک ٹن تیل درآمد کریسوں ،وفاقی وزیر توانائی محمد علی دی نگران وفاقی وزیر اطلاعات مرتضیٰ سولنگی دے رلے بریفنگ

اسلام آباد۔26اکتوبر(اے پی پی) نگران وفاقی وزیر توانائی محمد علی آکھیے گیس دیاں قیمتاں اچ اڄوکے ودھارے نال پٹرولیم سیکٹر دا گردشی قرضہ نہ ودھسی تے ہݨ گیس سیکٹر اچ ضیان نہ تھیسی ، کل ھک کروڑ اچوں 57 لکھ گیس  کنکشنز دا ٹیرف نی ودھایا ڳیا ،روس دے نال تیل مل گھنݨ دا کمرشل معاہدہ  تھی چکیے جیں دے تحت سالانہ 90  لکھ میٹرک ٹن تیل درآمد کریسوں ، امید اے روسی خام تیل مارکیٹ توں10 توں 15 ڈالر فی بیرل سستا پوسی ۔ وفاقی وزیر توانائی نگراں وفاقی وزیر اطلاعات مرتضیٰ سولنگی دے رلے بریفنگ اچ آکھیے جو ای سی سی  گیس دیاں قیمتاں اچ ودھارے دی منظوری ݙتی ہݨ اینکوں حتمی منظوری سانڳے کابینہ اجلاس اچ پیش کیتا ویسی ،گیس سیکٹر اچ گزریل کجھ سالاں اچ گردشی قرضہ 400 ارب روپے ہئی ۔گیس قیمتاں اچ ودھارے نال ساریں توں ودھ غریباں کوں تحفظ ݙتا ڳئے ۔  نگران  وزیر  توانائی آکھیے پچھلے 10 توں 15سالاں اچ انرجی سیکٹر اچ سرکلر ڈیٹ ہمیشہ ودھدا ہئی ۔ انہاں آکھیے پاور سیکٹر اچ لاسز موجود ہن، ساݙا اڳلا ہدف پاور سیکٹر اچ لاسز کوں ختم کرݨا اے ۔ وفاقی وزیر آکھیے آئل اتے گیس دی پیداوار پچھلے ݙاہ سال دے مقابلے اچ گھٹ اے تے لاسز اتے گردشی قرضے دی وجہ توں ادائیگیاں نہ تھیندیاں پیاں ہن جیں پاروں ٻہوں ساریاں کمپنیان ملک توں واپس ویندیاں پیاں ہن جیڑھا جو ہݨ نہ ویسن ۔ انہاں آکھیے گیس دیاں قیمتاں اچ ودھارے دا فیدہ ایکسپلوریشن کمپنیاں کوں تھیسی تے سرکلر ڈیٹ دا خاتمہ ضروری ہئی ۔ وزیر توانائی محمد علی ݙو ٹوک موقف ݙیندے ہوئیں آکھیے جو گیس دے نویں کنکشن نی لڳ سڳدے تے نہ لیسوں ، آندے ھک توں ݙو سال اچ گھریلو کنکشنز کوں وی ایل پی جی تے شفٹ ہووݨا پوسی ، اڳوں گیس بجلی گھراں کوں ہی ملدی رہسی ،دنیا اچ گیس دا استعمال گھراں دی بجائے بجلی گھراں کیتے ہوندے ۔ انہاں آکھیے اے تاثر غلط اے جو گیس دیاں قیمتاں اچ ودھارے دا فیدہ امیراں کوں تھئے ۔