اسلام آباد۔28نومبر (اے پی پی سرائیکی نیوز سروس)خواجہ غلام فرید دی شاعری اچ مقامیت دی جھلک نشابر اے ۔ پروفیسر رفعت عباس دا آکھنڑ ہا جو صوفی شاعر آپدے دور دے سامراج دے خلاف جدوجہد کیتی ۔ اوہ ملتان آرٹس کونسل ”خواجہ غلام فرید دی مقامی پڑھت” دے عنوان نال سیمینار اچ خطاب کریندے پئے ہن ۔ تقریب توں خطاب کریندے ہووئے انھاندا آکھݨ ہاجو خواجہ غلام فرید دی شاعری مشکل حالات اچ مرہم دا کم کریندی اے۔ ایں موقعے تے گالھ مہاڑ کریندے ہوئے سابق سٹیشن ڈائریکٹر ریڈیو پاکستان ڈاکٹر خالد اقبال دا آکھݨ ہا جو خواجہ غلام فرید وکھو وکھ مذہب دے لوکیں اچ ہم آہنگی پیدا کرݨ کیتے مقامی روایات دا سہارا گھدا۔ انھاں دی کافیاں تے ڈوجھے کلام مقامیت توں بھرپور اے ۔ نامور دانشور تے صحافی مظہر عارف آپدے خیالاں دا اظہار کیتا ۔ خواجہ فرید دی شاعری توں مقامیت کوں انج نی کیتا ونج سگدا ۔ انھاں آپدی شاعری اچ وکھو وکھ اسلوب دا استعمال کیتا ۔جیندے نال انھاں کوں نشابر مقام ملیا۔ نامور صحافی، لکھاری اتے اکادمی ادبیات دی بورڈ آف گورنرز دی ایگزیکٹو ممبر ڈاکٹر سعدیہ کمال دا آکھݨ ہا جوخواجہ غلام فرید ست زباناں دے ماہر ہن پر انھاں آپدی مادری زبان سرائیکی کوں ای اظہار دا دا ذریعہ ٻݨایا ۔ دنیا دے نامور شعراء خواجہ غلام فرید دی شاعری تے رشک کریندے ہیں ۔ انھاں مادری زبان دے فروغ سانگے بھرپور کوششاں کرݨ دی ضرورت تے وی زور ڈتا۔ نامور نقاد اتے دانشور ڈاکٹر محبوب تابش دا آکھݨ ہاجو سرائیکی زبان تے خواجہ غلام فرید دی شاعری کوں نسل اچ پڄاوݨ دی لوڑھ اے۔ صوفی شاعر دے کلاف دا مخاطب سارے مذاہب دے لوک ہن جئیں کیتے انہاں مقامی زبان تے سانجھ ثقافت دا سہارا ڳھدا۔ ڈائریکٹر ملتان آرٹس کونسل ڈاکٹر ریاض ہمدانی ڳالھ مہاڑ کریندیں ہوئیں آکھیا جو خواجہ غلام فریددی شاعری امن بقائے باہمی اتے مذہبی رواداری توں بھرپوراے۔ انہاں سیمینار دے مقررین اتے شرکاء دی آمد تے انہاں دا شکریہ ادا کیتا۔ تقریب دی نظامت دے فرائض ڈاکٹر عصمت اللہ شاہ سر انجام ݙتے۔
