تاحیات نااہلی کیس دا تفصیلی فیصلہ جاری، الیکشن ایکٹ اچ ترمیم دے بعد نااہلی 5 سال توں ودھ نی تھی سڳدی ، سپریم کورٹ

اسلام آباد ۔20فروری(اے پی پی) سپریم کورٹ آف پاکستان تاحیات نااہلی کیس دا تفصیلی فیصلہ جاری کرݙتا ۔آرٹیکل 62 ون ایف دے تحت سیاست داناں دی نااہلی کیس دا 53 ورقیں تے مشتمل فیصلہ چیف جسٹس پاکستان قاضی فائز عیسیٰ تحریر کیتے فیصلے اچ آکھیا ڳئے جو الیکشن ایکٹ اچ ترمیم دے بعد نااہلی 5 سال توں ودھ نی تھی سڳدی ۔فیصلے اچ آکھیا ڳئے جو پاناما کیس فیصلے اچ اے وضاحت نی کیتی ڳئی جو آرٹیکل 184 دی شق ترائے دے تحت سپریم کورٹ براہ راست کہیں امیدوار دی اہلیت دا تعین کیویں کرسڳدی اے ؟ کہیں امیدوار کوں نااہل کرݨ اچ عدلیہ کوں ٻہوں احتیاط دا مظاہرہ کرݨا چاہیدے ۔ فیصلے اچ لکھیا ڳئے جو سیاست داناں دی تاحیات نااہلی دا فیصلہ ختم کیتا ویندے ، الیکشن ایکٹ اچ ترمیم دے بعد نااہلی دی مدت 5 سال توں ودھ نی تھی سڳدی ، آرٹیکل 62 ون ایف اچ تاحیات نااہلی دا کتھائیں ذکر کائنی ۔تحریری فیصلے اچ آکھیا ڳئے جو کہیں امیدواردے کردار کوں پرکھݨ عدالت دا کم نی بلکہ جمہوری معاشرے اچ اے کم ووٹر دا اے ، نہ آئین اچ تے نہ ہی کہیں قانون اچ اے واضح کیتا ڳئے جو کورٹ آف لا کیڑھا عدالتی فورم ہوسی جیڑھا ڈیکلریشن ݙیوݨ دا مجاز ہوسی۔فیصلے اچ لکھیا ڳئے جو آرٹیکل 62  ون ایف اچ درج کائنی جو کورٹ آف لا کیا اے، آرٹیکل باسٹھ ون ایف واضح نی کریندا جو ڈیکلیئریشن کئیں ݙیوݨی اے ، ایجھا قانون کائنی جیڑھا واضح کرے جو 62 ون ایف دے تحت نااہلی دا طریقہ کار کیا ہوسی۔جسٹس یحییٰ آفریدی دا اختلافی نوٹ وی تفصیلی فیصلے اچ شامل اے۔جسٹس یحییٰ آفریدی اختلافی نوٹ لکھیے جو ’’تاحیات نااہلی ختم کرݨ دے فیصلے توں اختلاف کرینداں آرٹیکل 62 ون ایف دے تحت نااہلی مستقل یا تاحیات کائنی بلکہ کورٹ آف لا دی ڈیکلیئریشن تئیں محدود اے‘‘۔جسٹس منصور علی شاہ دا اضافی نوٹ وی تفصیلی فیصلے دا حصہ اے جیندے اچ آکھیا ڳئے جو سمیع اللہ بلوچ کیس اچ سپریم کورٹ دا تاحیات نااہلی دا فیصلہ ختم کیتا ویندے ، سپریم کورٹ تاحیات نااہلی دی ڈیکلیئریشن ݙے تے آئین بدلݨ دی کوشش کیتی ، الیکشن ایکٹ اچ ترمیم دے بعد نااہلی دی مدت پنج سال توں ودھ نی تھی سڳدی ۔ جسٹس منصورعلی شاہ لکھیے جو عدلیہ کوں آئین و قانون دے تحت فیصلے کرݨے چاہیدن۔