نگران حکومت دے ٻاہرلی سرمایہ کاری دے ودھارے تے کاروبار کوں سہولت ݙیوݨ سانڳے اقدامات دے مثبت نتیجے سامݨے آندے پئن ، نگران وزیراعظم

اسلام آباد۔21فروری(اے پی پی) نگران وزیراعظم انوار الحق کاکڑ آکھیے نگران حکومت دی گھٹ مدت اچ ٻاہرلی سرمایہ کاری دے ودھارے تے کاروبار کوں سہولت ݙیوݨ سانڳے اقدامات دے مثبت نتیجے سامݨے آندے پئن ، خصوصی سرمایہ کاری سہولت کونسل (ایس آئی ایف سی) دے تحت پاکستان اچ کھرباں ڈالر دی معدنیات دا شعبہ ترقی دیاں نویاں منزلاں طے کریندا پئے ، لوݨ دی برآمد اچ ودھارے نال پاکستان تے امریکا دے تجارتی تعلقات مزید تکڑے تھیسن ۔ اے ڳالھ انہاں امریکی کمپنی مریکل سالٹ کلیکٹیو انکارپوریشن دے وفد نال ملاقات اچ آکھی اے جنہاں چیئرمین و پریزیڈنٹ بورڈ آف ڈائیریکٹرز احمد ندیم خان دی سربراہی اچ انہاں نال ملاقات کیتی ۔ وزیراعظم آفس دے میڈیا ونگ توں جاری بیان موجب ملاقات اچ نگران وفاقی وزیر توانائی محمد علی اتے متعلقہ اعلیٰ حکام وی شرکت کیتی۔ ملاقات اچ وزیراعظم ایں امید دا اظہار کیتے جو گزریل ݙینھ پی ایم ڈی سی اتے مریکل سالٹ وچال دستخط ہووݨ آلے جوائنٹ وینچر دے بعد پاکستان دی نمک دی برآمدات اچ ودھارا تھیسی تے اے امریکا  پاکستان دے تجارتی تعلقات کوں مزید تکڑا کریسی ۔ وزیراعظم آکھیے جو اے منصوبہ ایں ڳالھ دا مظہرجو پاکستان اچ ٻاہرلی سرمایہ کاری سانڳے موزوں ترین موقع موجود ہن، ہمالیائی گلابی لوݨ پوری دنیا اچ پاکستان دی سنڄاݨ اے، ایندے بین الاقوامی منڈیاں اچ برآمد خوش آئند امر ہوسی۔ وزیراعظم آکھیے پاکستان اچ کھرباں ڈالردی معدنیات دے ذخیرے موجود ہن ، خصوصی سرمایہ کاری سہولت کونسل دے تحت پاکستان اچ ایں شعبے دی ترقی نویں منزلاں طے کیتیاں ویندیاں پئن ۔ مریکل سالٹ دے وفد حکومت بالخصوص خصوصی سرمایہ کاری سہولت کونسل دے کمپنی دے نال تعاون تے شکریہ ادا کیتے۔ وفد وزیراعظم کوں ݙسائے کمپنی دی پاکستان اچ تشکیل دے بعد اینکوں پوری دنیا دی وݙی سٹاک ایکسچینجز تے لسٹ کیتا ویسی جیں توں حکومت پاکستان اتے مقامی سرمایہ کاراں کوں وی فیدہ تھیسی۔