اسلام آباد۔22فروری(اے پی پی سرائیکی نیوز سروس : ڈاکٹر سعدیہ کمال) مادری زباناں دے عالمی ݙینھ تے اکادمی ادبیات پاکستان ولوں پنجابی ادبی پرچار اسلام آباد دے تعاون نال 21 فروری کوں سیمینار بعنوان ’’پاکستانی زباناں کوں درپیش مشکلات‘‘ تھیا ۔ صدارت ڈاکٹر واحد بخش بزدارکیتی، مہمان خصوصی شریف شاد ہن تے نظامت طارق بھٹی کیتی ۔ اکادمی ادبیات پاکستان دے ناظم اعلیٰ سلطان ناصر خصوصی طور تے شریک تھئے ۔ سیمینار اچ پاکستان اچ ٻولی ونڄݨ آلیاں مختلف مادری زباناں دی نمائندگی کریندے ہوئے مظہرعارف ( سرائیکی ) ڈاکٹرمنظور علی ویسریو (سندھی)، اقبال حسین افکار (پشتو) ڈاکٹر قاسم یعقوب (اردو) عامر ظہیر بھٹی (پنجابی) ضیا الدین (ہندکو)، محمد اشفاق عباسی (پہاڑی) اتے شریف شاد (پھوٹوہاری) تے ݙوجھیاں آپدیاں زباناں اچ ڳالھ مہاڑ کیتی ۔ مظہر عارف سرائیکی زبان تے ادب دی اہمیت تے وکھو وکھ مسئلیاں کوں نشابر کیتا ۔ڈاکٹر واحد بخش بزدارزبان دا سینکڑاں سالہ تہذیبی ورثہ تے ڳالھ مہاڑ کیتی ۔ تاں جو اے تہذیبی ورثہ زبان دے ذریعے نویں نسل تئیں منتقل کرݨ دی لوڑھ اے۔اکادمی دے ناظم اعلیٰ سلطان ناصردا آکھݨ ہا جو پاکستانی زباناں دے فروغ تے تحفظ کیتے ضروری اے جو اساں آپدیاں زباناں تے تہذیب و ثقافت دے تنوع کوں ودھاؤں تے جدیدٹیکنالوجی دی مدد نال ای اساں پاکستانی زباناں کوں فروغ ݙے سگدے آں انھاں دا ٻیا آکھݨ ہا جو کوئی وی زبان آپدی تہذیب دا در ہوندی اے اتے تہذیباں کوں اڳوں ودھاوݨ اچ اہم ہوندی اے تے پاکستانی زباناں کیتے اکادمی ادبیات ترجیحی بنیاداں تے کم کم کریندی پئی اے تے پاکستانی زباناں سانڳے اے پلیٹ فارم حاضر اے۔ اخیر اچ طارق بھٹی قرار داد پیش کیتی جو اکادمی پاکستانی زباناں دے حوالے نال ڈیجیٹل ڈکشنریاں تیار کرے ایندے کیتے اساں سبھے شاعر ادیب معاونت سانڳے حکومت توں بھرپور اپیل کریسوں۔
