وفاقی حکومت ولوں آزاد کشمیر اچ مینہ اتے برف باری دےمتاثرین کوں 13 مارچ تئیں معاوضہ ݙے ݙتا ویسی، اساں ساریاں رَل تے پاکستان دے مسئلے اتے چیلنجز دا مقابلہ کرݨے، وزیراعظم محمد شہبازشریف

مظفر آباد۔8مارچ  (اے پی پی) وزیراعظم محمد شہبازشریف آکھیا جو وفاقی حکومت ولوں آزاد کشمیر اچ مینہ اتے برف باری دےمتاثرین کوں 13 مارچ تئیں معاوضہ ݙے ݙتا ویسی، اساں ساریاں رَل تے پاکستان دے مسئلے اتے چیلنجز دا مقابلہ کرݨے۔ ویلھا آڳئے جو معیشت بارے وݙے فیصلے کیتے ونڄن۔ اے ڳالھیں انہاں جمعے کوں آزاد کشمیر اچ مینہ اتے برف باری دے متاثرین نال ملاقات اتے ڳالھ مہاڑ کریندیں ہوئیں آکھی۔ ایں موقع تے انہاں مینہ اتے برف باری اچ جاں بحق تھیوݨ آلیاں دے لواحقین اچ امدادی چیک تقسیم کیتے۔

ایں توں پہلے وزیراعظم آزاد کشمیر چوہدری انوار الحق ولوں وزیراعظم شہبازشریف کوں اڄوکے مینہ پاروں آزاد کشمیر اچ تھیوݨ آلے ضیان تے بریفنگ ݙتی ڳئی۔ انہاں ݙسیا ڳیا جو برف باری پاروں آزاد کشمیر اچ اٹھ بندے جاں بحق تھین، 88 گھر پورےتباہ تھی ڳئن اتے 281 گھراں اتے 26 دکاناں دا جزوی ضیان تھیے۔ وزیراعظم ایں موقع تے آکھیا جو اساں جاں بحق تھیوݨ آلیاں دی مغفرت اتے زخمیاں دی جلدی صحت یابی کیتے دعا کریندوں۔ انہاں آکھیا جو ایں اوکھ اچ اساں متاثرین نال کھڑوں۔ وزیراعظم آزاد کشمیر کشمیری عوام نال اظہار یکجہتی تے وزیراعظم پاکستان شہبازشریف دا شکریہ اداکریندیں ہوئیں آکھیا جو پاکستان دی حکومت اتے عوام ہمیشہ کشمیر دی عوام نال کھڑے رہسن۔

این ڈی ایم اے دے چیئرمین جنرل انعام ، سپیکر قانون ساز اسمبلی چوہدری لطیف اکبر ، مسلم لیگ (ن) آزاد کشمیر دے صدر شاہ غلام قادر ، رکن قومی اسمبلی عطاء اللہ تارڑ ، چیف سیکرٹری، آئی جی ،آزاد کشمیر کابینہ دے اراکین اتے بارشاں اتے برف باری توں متاثرہ لوکاں دی وݙی تعداد موجود ہئی۔