پاکستان موسمیاتی خطریں دا ساریں توں ودھ شکار دنیا اچ پنجواں ملک اے، پوری قوم شجر کاری مہم اچ حصہ گھنے، وزیراعظم محمد شہباز شریف

اسلام آباد۔15مارچ (اے پی پی):وزیراعظم محمد شہبازشریف ملک کوں ماحولیاتی خطریں توں بچاوݨ سانڳے پوری قوم کوں شجر کاری مہم اچ بھرپور حصہ گھنݨ دی اپیل کریندے ہوئیں آکھیے جو پاکستان دنیا اچ موسمیاتی خطریں دا ساریں توں ودھ شکار پنجواں ملک اے ، موسمیاتی تبدیلی دے خطریں نال نبݨݨ سانڳے آگاہی ضروری اے، ملک اچ جنگلات دارقبہ صرف 5 فیصد اے، اڄوکے سال بوٹے رہاوݨ دا ہدف ݙو گنا کیتا ویسی ۔ اے ڳالھ انہاں وزیراعظم ہاؤس اچ موسم بہار دی ملک گیرشجر کاری مہم دے آغاز دی تقریب توں خطاب کریندے ہوئیں آکھی اے ۔ ایں موقع تے وزیرمملکت انفارمیشن ٹیکنالوجی شزہ فاطمہ خواجہ وی موجود ہن۔ وزیراعظم محمد شہبازشریف آکھیے جو ٻوٹا رہا تے ملک اچ موسم بہار دی شجر کاری شروع کرݙتی اے ، ساݙی پچھلی حکومت ملک اچ ٻوٹے رہاوݨ دا ہدف مقرر کیتا ہئی اڄوکے سارے ٻوٹے رہاوݨ دی تعداد ݙوگنا کریسوں۔ پورےملک اچ موسم بہار دی شجر کاری دا آغازکرݙتے۔ انہاں آکھیے 1999 توں 2018 دے دوران موسمیاتی تبدیلیاں پاروں 10ہزار قیمتی جاناں ضائع تھئن ساݙی معیشت کوں ارباں ڈالردا ضیان تھئے، ایں سانڳے تعلیمی اداریں اچ وی ایں خطرےتوں آگاہی ݙیوݨ ضروری اے شجر کاری مہم کوں پورے ملک اچ کھنڈاوݨ سانڳے ساریاں کوششاں کیتیاں ونڄݨیاں چاہیدن ۔