موسمیاتی تبدیلی نال نمٹݨ کیتے جامع اتے مؤثر حکمت ٻݨائی ونڄے، وزیر اعظم محمد شہباز شریف

اسلام آباد۔30مارچ(اے پی پی):وزیر اعظم محمد شہباز شریف آکھیے جو موسمیاتی تبدیلی ہک ٻہوں وݙا اتے اہم مسئلہ اے، موسمیاتی تبدیلی نال نمٹݨ کیتے جامع اتے مؤثر حکمت ٻݨائی ونڄے۔ لاہور اچ وزارت موسمیاتی تبدیلی دے معاملیاں بارے اجلاس تھئے جیندے اچ موسمیاتی تبدیلی بارے پالیسیاں، منصوبیاں اتے ایں سانڳے اڄوکی اڳونہی تے بریفنگ ݙتی ڳئی۔ وزیر اعظم آکھیا جو موسمیاتی تبدیلی سارے ڄڳ آلی کار ساݙے کیتے وی ہک وݙا چیلنج ٻݨدی ویندی اے جیندے نال نمٹݨ کیتے موثر اقدامات کرݨے ہوسن، ایں سانڳے ہک جامع اتے مؤثر لائحہ عمل ٻݨاوݨ دی لوڑھ اے، ماحولیاتی تبدیلی زراعت، توانائی، پانی، انفراسٹرکچر اتے کئی ٻئے شعبیاں نال جڑی ہوئی اے، موسمیاتی تبدیلی نال تھیوݨ آلے مسلیاں اتے انہاں نال نمٹݨ کیتے ہک کمیٹی ٻݨائی ونڄے۔ اجلاس اچ وفاقی وزیر اطلاعات و نشریات عطا تارڑ، وفاقی وزیر منصوبہ بندی و ترقی احسن اقبال، وفاقی وزیر برائے اقتصادی امور احد چیمہ، متعلقہ اداریاں دے اعلیٰ افسران اتے شعبہ ماحولیاتی تبدیلی دے ماہرین شرکت کیتی۔