وزیرِاعظم دی اڳواݨی اچ اقتصادی شعبے دی اصلاحات بارے اعلیٰ سطح اجلاس

اسلام آباد۔4اپریل(اے پی پی):وزیرِ اعظم محمد شہباز شریف آکھیے جو آندے 5 سالاں اچ ٹیکس کوں جی ڈی پی دے 15 فیصد تئیں ڳھن ویسوں، سرکاری ملکیت دے ادارے بالخصوص خسارے دے شکار اداریاں دی اصلاحات و نجکاری تیکھی کیتی ونڄے، بیرونی قرضے ڳھٹاوݨ کیتے جامع پلان ٻݨایا ونڄے۔ اے ڳالھ انہاں اسلام آباد اچ تھیوݨ آلے اقتصادی شعبے دی اصلاحات بارے اعلیٰ سطح اجلاس دی اڳواݨی کریندے آکھیے۔ اجلاس اچ وفاقی وزراء محمد اورنگزیب، احد خان چیمہ، ڈاکٹر مصدق ملک، احسن اقبال، ڈپٹی چئیرمین پلاننگ کمیشن جہانزیب خان، وزیرِ اعظم دے کوآرڈینیٹر رانا احسان افضل اتے متعلقہ اعلیٰ حکام شرکت کیتی۔ اجلاس کوں محصولات، مالی خسارے، زرمبادلہ دے ذخائر، ترسیلاتِ زر اتے کرنٹ اکائونٹ بارے تفصیلی بریفنگ ݙتی ڳئی۔ اجلاس اچ محصولات، سبسڈیز، بجلی دے شعبے دی اصلاحات دے نال نال وزیرِ اعظم دی حکومتی اخراجات ڳھٹاوݨ دی ہدایات تے عملدرآمد وی ݙسائی ڳئی۔ وزیراعظم ہدایت کیتی جو عام آدمی تے ٻھار سٹیے بغیر محصولات ودھاوݨ کیتے جامع پلان ݙتا ونڄے۔ وزیرِاعظم آکھیے جو وفاق صوبیاں کوں تکرا کر تے 18ویں ترمیم دیاں متعلقہ وزارتاں اتے ادارے صوبیاں کوں ݙیسی، مالی خسارے ڳھٹاوݨ کیتے خرچے ڳھٹ کیتے ویسن، ملک دے وݙے ایئرپورٹس تے سروسز دی بہتری کیتے نجی آپریٹرز توں پبلک پرائیویٹ پارٹنرشپ کیتی ویسی۔ وزیرِاعظم آکھیے جو سرکاری قرض اچ بتدریج کمی، پنشن و سبسڈی اصلاحات، سرکاری ملکیتی اداریاں دی اصلاحات اتے نجکاری تے حکومت دی ودھ توجہ اے۔ وزیرِاعظم ہدایت کیتی جو اقتصادی شعبے دی ترقی کیتے بین الاقوامی شہرت یافتہ ماہرین دیاں خدمات ڳھدیاں ونڄن۔