راولپنڈی ۔16اپریل(اے پی پی):کورکمانڈر زکانفرنس فلسطینی عوام دے نال یکجہتی دا اظہار کریندے ہوئیں غزہ اچ انسانی حقوق دی سنگین خلاف ورزیاں، جنگی جرائم اتے نسل کشی دی مذمت کیتی ، فورم مشرقِ وسطیٰ اچ ودھدی کشیدگی تے تشویش دا اظہار کریندے ہوئیں آکھیے جے فریقین وختی کشیدگی کوں گھٹ نہ کیتا تاں ھک وسیع علاقائی جھیڑا جنم گھن سڳدے ۔فورم مسلح افواج دی حوصلہ شکنی سانڳے بدنیتی تے …
پاک فوج دے سربراہ جنرل سید عاصم منیر دی زیر صدارت کورکمانڈرز کانفرنس ، فلسطینی عوام نال اظہار یکجہتی ،غزہ اچ انسانی حقوق دی سنگین خلاف ورزیاں، جنگی جرائم اتے نسل کشی دی مذمت
راولپنڈی ۔16اپریل(اے پی پی):کورکمانڈر زکانفرنس فلسطینی عوام دے نال یکجہتی دا اظہار کریندے ہوئیں غزہ اچ انسانی حقوق دی سنگین خلاف ورزیاں، جنگی جرائم اتے نسل کشی دی مذمت کیتی ، فورم مشرقِ وسطیٰ اچ ودھدی کشیدگی تے تشویش دا اظہار کریندے ہوئیں آکھیے جے فریقین وختی کشیدگی کوں گھٹ نہ کیتا تاں ھک وسیع علاقائی جھیڑا جنم گھن سڳدے ۔فورم مسلح افواج دی حوصلہ شکنی سانڳے بدنیتی تے مبنی پروپیگنڈا مہم تے تشویش دا اظہار کیتے تے زور ݙتے جو ”انھاں بے بنیاد الزامات دا مقصد عوام اتے پاکستان دی مسلح افواج وچال دراڑ پاوݨ دی کوشش اے ۔ آئی ایس پی آر موجب پاک فوج دے سربراہ جنرل سید عاصم منیر دی زیر صدارت 264ویں کور کمانڈر ز کانفرنس تھئی۔ کانفرنس دے شرکاء مسلح افواج دے افسراں، نینگراں، قانون نافذ کرݨ آلے اداریں تے شہریاں سودھے شہداء دی عظیم قربانیاں کوں زبردست خراجِ تحسین پیش کیتا، جنہاں ملک اچ امن و استحکام سانڳے آپݨی جاناں دا نذرانہ پیش کیتے ۔آرمی چیف انسدادِ دہشتگردی دے خلاف جاری آپریشن دے دوران ٻہوں سارے دہشتگردانہ حملیں کوں کامیابی نال ناکام بݨاوݨ تے اہم دہشتگرد سرغنہ کوں جہنم واصل کرݨ اچ پاک فوج اتے قانون نافذ کرݨ آلے اداریں دیاں کوششاں دی تعریف کیتی ۔آرمی چیف کمانڈرز کوں ہدایت کیتی جو دہشتگرداں کوں کہیں وی جاہ تے فعال نہ تھیوݨ ݙیون ۔آرمی چیف آکھیے پاکستان دی مسلح افواج اتے قانون نافذ کرݨ آلے اداریں کوں پوری قوم دی حمایت حاصل اے ۔مسلح افواج پاکستان توں دہشتگردی دے ایں خطرے کوں مستقل طور تے مکاوݨ سانڳے پرعزم اے ، ان شاء اللہ۔ فورم بشام اچ چینی شہریاں تے بزدلانہ دہشتگردانہ حملے اتے بلوچستان اچ نشوم شہریاں دے بہیمانہ قتل دی مذمت کیتی۔ فورم کوں بریفنگ ݙتی ڳئی جو کیویں افغانستان توں سرگرم دہشتگرد گروہ علاقائی اتے عالمی سلامتی سانڳے خطرہ ہن ۔فورم کوں بریفنگ اچ اے وی ݙسایا ڳئے جو اے دہشتگرد گروہ پاکستان اتے ایندے اقتصادی مفادات بالخصوص چین پاکستان اقتصادی راہداری( سی پیک) دے خلاف تے کیڑھے طور تے کم کریندے پئن ۔فورم غیر قانونی طور تے مقبوضہ جموں و کشمیراچ جاری بھارتی جارحیت تے شدید تشویش دا اظہار کیتے۔ فورم ایں ڳالھ دا اعادہ کیتے جو پاکستان اپݨے کشمیری بھیݨ بھراویں دی سیاسی، سفارتی اتے اخلاقی حمایت جاری رکھیسی ۔ آرمی چیف فیلڈ کمانڈرز کوں ہدایت کیتی جو آپریشنل تیاری اتے مورال دے اعلیٰ ترین معیار کوں یقینی بݨاوں تے تربیت دے اعلیٰ معیار دے ذریعے پیشہ ورانہ مہارت حاصل کرن ۔
