معیشت دی بہتری دے ثمرات وختی عوام تئیں پڄسن ، سعودی وفد پاکستان اچ سرمایہ کاری سانڳے سنجیدگی دا مظاہرہ کیتے، وفاقی وزیر اطلاعات عطاءاللہ تارڑ دی پریس کانفرنس

اسلام آباد۔17اپریل  (اے پی پی):وفاقی وزیر اطلاعات و نشریات عطاء اللہ تارڑ آکھیے حکومت دیاں معیشت کوں چنڳاں کرݨ دیاں کوششاں دے ثمرات وختی عوام تئیں پڄسن ، دوست ملک جیڑھی سنجیدگی نال پاکستان نال ڳالھ مہاڑ کریندے پئن او پاکستان دی خارجہ پالیسی دا نواں باب اے ۔ کݨک دے وافر ذخیرے موجود ہن ۔ کابینہ چارے صوبائی حکومتاں کوں کݨک دی پروکیورمنٹ دے ہدف کوں ودھاوݨ سانڳے  خط لکھݨ دا فیصلہ کیتے ۔ بلوچستان اچ اپوزیشن جماعتاں دا پہلا جلسہ ناکام رہیا، جیویں تقریراں کیتیاں ڳئن ایں توں لڳدے جو اے کمپنی چلݨ آلی کائنی اے آپت اچ ھک ٻئے دا گریباں وٹھی کھڑن، گوہر صاحب دی ڳالھ شیر افضل رد کرݙیندن ، تحریک انتشار دے اندر آپت اچ پھٹ اے ۔ پی ٹی وی ہیڈ کوارٹرز اچ پریس کانفرنس توں خطاب کریندے ہوئیں وفاقی وزیر اطلاعات آکھیے حکومت دے آندے ہی معیشت دے حوالے ںال چنڳیاں خبراں سامݨے آندیاں پئن ۔ حکومت اتے وزیراعظم شہباز شریف کوں کجھ ہی عرصے اچ عالمی سطح تے پذیرائی ملی، پاکستان کوں دوست ملکاں دی طرفوں عزت ݙتی ویندی پئی اے تے جیں سنجیدگی نال معاملات تے ڳالھ تھیندی پئی اے اے ساݙی خارجہ پالیسی دے اندر ھک نواں باب اے ۔ وفاقی وزیر اطلاعات آکھیے پاکستان ھک سٹریٹجک نیوکلیئر اسٹیٹ اے، اساکوں ایں تے فخر اے تے اے اساں کیتے اعزاز دی ڳالھ اے ۔ عالمی جریدے، مالیاتی ادارے تے آزاد تجزیہ کاراں دی طرفوں آکھیا ویندا پئے جو حکومت معیشت کوں چنڳاں بݨاوݨ سانڳے کلیدی کردار نبھیندی پئی اے ۔ انہاں آکھیے ساݙی خوش قسمتی اے جو وزیراعظم اتے انہاں دی پوری کابینہ محنت نال کم کریندے پئن ، حکومت آندے ہی معیشت دے حوالے نال اہم فیصلے کیتے جیں دی وجہ توں عالمی سطح تے پاکستان کوں پذیرائی ملی۔ انہاں آکھیے وزیراعظم دا سعودی عرب دا دورہ کامیاب رہیا ایندے نتیجے اچ سعودی وفد پاکستان دا دورہ کیتے اساں سعودی وفد دے شکر گذارہیسے جیں سرمایہ کاری دے حوالے نال سنجیدگی دا مظاہرہ کیتے۔ وفاقی وزیر آکھیے کجھ ݙینھ اچ سعودی عرب توں ھک اعلیٰ سطحی وفد وی پاکستان آسی تے معاہدیں تے دستخط اچ پیشرفت تھیسی ۔