پنجاب  اچ مینھ وسݨ دا سلسلہ 29 اپریل تئیں جاری رہݨ دا امکان اے ، ترجمان پی ڈی ایم اے

لاہور۔23اپریل  (اے پی پی):پنجاب اچ مینھ وساوݨ آلا سسٹم داخل تھی ڳئے جیں پاروں مینھ وسݨ دا سلسلہ 29 اپریل تئیں جاری رہݨ دا امکان اے ۔ ترجمان پی ڈی ایم اے  موجب سنوار توں صوبائی دارالحکومت لاہور سودھے پنجاب اچ مینھ وساوݨ آلا سسٹم داخل تھی ڳئے جیں پاروں اندھاری /جھکڑ چلݨ / کھمݨ نال مینھ تے کجھ جہیں تے گڑھا وسݨ دا وی امکان اے۔ ڈی جی پی ڈی ایم اے عرفان علی کاٹھیا صوبے دے ڈپٹی کمشنرز کوں ہدایت کریندے ہوئیں آکھیے جو کہیں وی ہنگامی صورت حال نال نبݨݨ سانڳے سارے متعلقہ محکمیں کوں الرٹ رکھیا ونڄے ۔ ایں توں انڄ صوبائی کنٹرول روم سودھے سارے ضلعیں دے ڈسٹرکٹ ایمرجنسی آپریشن سینٹرز کوں وی الرٹ کرݙتا ڳئے جݙاں جو پی ڈی ایم اے کنٹرول روم اچ صورتحال دی مانیٹرنگ جاری اے۔انہاں شہریاں کوں وی ہدایت کریندے ہوئیں آکھیے جو او خراب موسم اچ  بجلی دے کھمبے اتے لڑکدیاں تاراں توں ھک پاسے رہن ۔ آسمانی بجلی توں بچݨ سانڳے محفوظ جاہ تے رہن ۔ بجلی دی گاج تے طوفانی صورتحال اچ کھلے آسمان تلے ہرگز نہ ونڄن ،ٻالاں دا خاص خیال رکھن تے پاݨی آلے علاقیں اچ کہیں صورت نہ ونجݨ ݙتا ونڄے ۔ڈی جی پی ڈی ایم اے آکھیے شہری غیر ضروری سفر نہ کرن تے ڳاݙی ہولے چلاون۔ انہاں آکھیے ماحولیاتی تبدیلیاں پاروں پاکستان کوں غیر معمولی مینھ دا سامݨا اے ۔ شہری مدد سانڳے  پی ڈی ایم اے دی ہیلپ لائن 1129 تے کال کرسڳدن۔