حکومت معیشت کوں مستحکم  ، ترقی دے موقع ودھاوݨ، مہانگ تے قابو پاوݨ ، تلویں طبقے کوں ریلیف ،غیر ملکی سرمایہ کاری کوں راغب  تے معاشی نمو کوں تکھا کرݨ سانڳے اقدامات کریندی پئی اے، وزیرخزانہ

اسلام آباد۔23اپریل(اے پی پی):وفاقی وزیر خزانہ و محصولات  محمد اورنگزیب آکھیے جو حکومت معیشت کوں مستحکم کرݨ ، ترقی دے موقع ودھاوݨ ، مہانگ تے قابو پاوݨ اتے معاشرے دے تلویں طبقے کوں ریلیف ݙیوݨ ،غیر ملکی سرمایہ کاری گھن آوݨ تے معاشی نمو کوں تکھا کرݨ سانڳے اقدامات کریندی پئی اے ۔ حکومتی اقدامات دے نتیجے اچ کرنٹ اکاؤنٹ خسارہ گھٹ تھئے۔ اے ڳالھ انہاں اسلام آباد بزنس سمٹ 2024 اچ ’’ترقی سانڳے تعاون‘‘دے موضوع تے خطاب کریندے ہوئیں آکھی اے ۔ انہاں آکھیے جو حکومت معیشت کوں مستحکم کرݨ تے ترقی دے موقع ودھاوݨ سانڳے اقدامات کیتن ۔زراعت اتے صنعت دی کارکردگی اچ بہتری دی توقع اے۔انہاں آکھیے جی ڈی پی اچ مالی سال 2024 اچ 2.6 فیصد ودھارے دی توقع اے۔ افراط زر دی شرح 24 فیصد رہݨ دا تخمینہ اے، جیڑھا جو مالی سال 2023 اچ 29.2 فیصد توں گھٹ اے ۔ کرنٹ اکاؤنٹ خسارہ اتے مالیاتی خسارہ پائیدار حداں اچ رہݨ دا امکان اے ۔ حکومت زرعی شعبے دی کارکردگی چنڳی کرݨ سانڳے اقدامات کیتن ۔ انہاں آکھیے اہم فصلاں دی پیداوار غیر معمولی اے۔جولائی توں فروری 2024 دے دوران زرعی قرضیں دی ونڈ اچ 33.6 فیصد ودھارا تھئے ۔ چنڳیاں فصلاں پاروں صنعتی شعبے تے چنڳے اثرات پوسن وزیرخزانہ آکھیے حکومت افراط زر کوں قابو کرݨ سانڳے اقدامات کیتن۔