سعودی عرب وختی پاکستان اچ 5 ارب ڈالر دی سرمایہ کاری کریسی، سرمایہ کاری ودھاوݨ سانڳے ایس آئی ایف سی دا کردار قابل ستائش اے، احسن اقبال

اسلام آباد۔23اپریل(اے پی پی):وفاقی وزیر منصوبہ بندی ، ترقی ، اصلاحات و خصوصی اقدامات احسن اقبال آکھیے سعودی عرب  وختی پاکستان اچ 5 ارب ڈالر دی سرمایہ کاری کریسی ،سرمایہ کاری دے ودھارے سانڳے ایس آئی ایف سی دا کردار  قابل ستائش اے، 7 فیصد معاشی گروتھ توں 2047 تئیں پاکستان 2 ہزار ارب ڈالر دی معیشت بݨ سڳدے۔ اے ڳالھ انہاں بزنس سمٹ توں خطاب اچ آکھی اے انہاں آکھیے  یو اے ای، کویت  تے قطر نال ڳالھ مہاڑ جاری اے تاں جو پاکستان اچ ودھ توں ودھ سرمایہ کاری کیتی ونڄ سڳے۔ جݙاں جو سرمایہ کاری دے ودھارے سانڳے ایس آئی ایف سی دا کردار ٻہوں چنڳاں اے۔ انہاں آکھیے پاکستان اڳلے ست توں اٹھ سال برآمدات 100 ارب ڈالر تئیں گھن ڳیا تاں ٹیک آف کر ویسی ، بدقسمتی نال ماضی اچ پاکستان برآمدات ودھاوݨ اچ ناکام رہیا۔حکومت  معیشت کوں تکڑا کرݨ سانڳے چنڳے اقدامات کریندی پئی اے جݙاں جو کہیں وی ملک دی ترقی سانڳے امن، استحکام اتے پالیسیاں دا تسلسل ضروری اے، گھٹ توں گھٹ ݙاہ سال دا تسلسل ہووݨا چاہیدے ۔ انہاں آکھیے جے پاکستان اچ سیاسی تسلسل قائم نہ تھیا تاں دائریں اچ گھمدے رہسوں جیں توں ملک پچھی تے ویسی ۔وفاقی وزیر منصوبہ بندی آکھیے 7 فیصد معاشی گروتھ  توں 2047 تئیں پاکستان 2 ہزار ارب ڈالر دی معیشت بݨ سڳدے ، جݙاں جو پاکستان9فیصد معاشی گروتھ توں  2047 تئیں 3 ہزار ارب ڈالر دی معیشت بݨ سڳدے جیں سانڳے موجودہ حکومت بھرپور اقدامات کریندی پئی اے ۔پاکستان اچ 2017 دے بعد حکومت دی تبدیلی توں ساریں توں پہلا نشانہ سی پیک بݨیا، جیں توں ملک دا ٻہوں ضیان تھئے ۔ اجلاس موجودہ حکومت سی پیک فیز 2  تے عملدرآمد سانڳے اقدامات کریندی پئی اے ایں حوالے نال چین توں مزید پیشرفت تھیندی پئی اے ۔ پاکستان اگلے ترائے سال اچ 70 ارب ڈالر ادا کرݨن ،  حکومت اتے نجی شعبہ رل تے کم کرسڳدن جݙاں جو معاشی ترقی سانڳے رل تے کم کرݨا ہوسی ۔