شہریوں کوں آئین تے قانون دے تحت دستیاب سہولتاں دی کوئی خلاف ورزی کائنی، لاپتہ لوکاں دے مسئلے دا سیاسی حل وی کڈھݨا ہوسی، سینیٹر اعظم نذیر تارڑ

اسلام آباد۔23اپریل(اے پی پی):وفاقی وزیر قانون و انصاف  سینیٹر اعظم نذیر تارڑ آکھیے جو پاکستان دہشت گردی دے خلاف جنگ اچ بے پناہ قربانیاں ݙتن، گزریل چار ݙھاکے توں ملک اوکھ دا سامݨا کیتے ، لاپتہ لوکاں دا معاملہ اتنا سوکھا کائنی ، ایندی ٻہوں ساری وجوہات ہن ، ایں مسئلے دے قانونی حل دے نال سارے شراکت داراں کوں رل ٻہہ تے ھک سیاسی حل وی کڈھݨا ہوسی ۔ پاکستان داآئین و قانون  شہریاں کوں جیڑھیاں سہولتاں ݙیندے انہاں  دی کوئی خلاف ورزی کائنی تے ہووݨی وی نی چاہیدی اے انہاں دا حق اے ۔لاپتہ لوکاں دے حوالے نال حکومت ماضی اچ کم کیتے تے ھک پارلیمانی کمیٹی بݨائی ، دہشت گردی دا شکارتھیوݨ آلے شہدا دے لواحقین دے وی تحفظات ہن، لاپتہ لوکاں دے 8 ہزار دے نیڑے کیس حل تھی چکئن ، لاپتہ لوکاں دا مسئلہ حل کرݨ اچ حکومت دی سنجیدگی اچ کوئی کمی کائنی آئی، سوشل میڈیا، بحث ، جلد بازی،عدالتی  احکامات نال اے مسئلہ وختی حل نی تھی سڳدا ہݨ وی ٻہوں کم کرݨ دی لوڑھ اے ۔ سارے شراکت داراں دی مشاورت نال ایں اہم مسئلے کوں حل کیتا ویسی ۔ وفاقی وزیر قانون و انصاف  سینیٹر اعظم نذیر تارڑ وفاقی وزیر اطلاعات و نشریات عطااللہ تارڑ  دے رلے پریس کانفرنس کریندے ہوئیں مسنگ پرسنز دے حوالے نال آکھیے جو اے مسئلہ وݙے عرصے توں سیاسی ، قانون اتے عسکری حلقیں اچ ھک حساس مسئلہ سمجھیا ویندے تے ایں تے ڳالھ مہاڑ ، تنقید  کیتی ویندی تے تے ایں تے آواز وی چاتی ویندی پئی اے انہاں آکھیے ملک دے آئین اتے قانونی نظام اچ بنیادی  حقوق دے حوالے نال جیڑھا تحفظ  حاصل اے، بلا شبہ  حکومت کوں آپݨی ذمہ واریاں دا پورا احساس اے ۔