معیاری تعلیم دا فروغ اساݙی حکومت دی پہلی ترجیح اے، اساݙی پوری کوشش اے جو کوئی وی ٻال سکول توں ٻاہر نہ ہووے، وزیراعظم محمد شہباز شریف دی برطانیہ دی معروف جامعات دے نمائندہ وفد نال ڳالھ مہاڑ

اسلام آباد۔23اپریل  (اے پی پی) وزیراعظم محمد شہباز شریف آکھیا جو معیاری تعلیم دا فروغ اساݙی حکومت دی پہلی ترجیح اے، اساݙی پوری کوشش اے جو کوئی وی ٻال سکول توں ٻاہر نہ ہووے۔ وزیر اعظم آفس دے میڈیا ونگ توں جاری بیان موجب وزیراعظم محمد شہباز شریف نال برطانیہ دی معروف جامعات  دے نمائندیاں دے وفد نال منگل کوں اسلام آباد اچ ملاقات کیتی۔ وفد دے اڳواݨ برطانیہ دے انٹرنیشنل ایجوکیشن چیمپئن سر اسٹیو اسمتھ ہن۔ ملاقات اچ وفاقی وزیر تعلیم خالد مقبول صدیقی، رکن قومی اسمبلی رومینہ خورشید عالم، وزیراعظم دے معاون خصوصی طارق فاطمی ، پاکستان اچ برٹش کونسل دے کنٹری ڈائریکٹر جیمز ہیمپسن، چیئرمین ہائر ایجوکیشن کمیشن اتے متعلقہ اعلیٰ سرکاری افسر وی موجود ہن۔ وزیراعظم وفد کوں پاکستان اچ خوش آمدید آکھیا۔ وزیراعظم ایں موقع تے آکھیا جو معیاری تعلیم دا فروغ اساݙی حکومت دی پہلی ترجیح اے، اساݙی پوری کوشش اے جو کوئی وی ٻال سکول توں ٻاہر نہ ہووے۔وفد برطانیہ اتے پاکستان وچال اعلیٰ تعلیم دے شعبے اچ سانجھ اتے تعاون بارے دلچسپی ݙکھائی۔ وفد پاکستان اچ شاندار میزبانی تے وزیراعظم اتے حکومتی اداریاں دا شکریہ ادا کیتا۔