اسلام آباد۔23اپریل(اے پی پی سرائیکی نیوز سروس: ڈاکٹر سعدیہ کمال) علامہ اقبال اوپن یونیورسٹی دے پروفیسر جواد احمد آکھیے جو دنیا دے محققین نے 23 اپریل کوں کتاب دے مطالعے دا جڳ ݙیھاڑ مناوݨ دی قرارداد پیش کیتی ہئی۔ دنیا دے ٻہوں سارے ملکاں اچ 23 اپریل کوں کتاب دا جڳ ݙیھاڑ منایا ویندے تے دنیا دے محققین ، طالب علم تے سکالر کتاب دی اہمیت تے ڳالھ مہاڑ کریندن۔ انہاں آکھیے کتاب انفارمیشن دا ھک سورس اے جیڑھا ماضی دے دریچے ساݙے سامݨے نشابر کریندے ۔ انہاں آکھیے کتاب دا مطالعہ ساݙے مستقبل اچ مختلف رازاں کوں ساݙے تے کھلیندے ۔انہاں آکھیے کہیں محقق کیا خوب آکھیا ہئی ” جے کتاب نہ ہوندی تاں خدا وی خاموش اے” انہاں آکھیے جو کتاب ہی ہے جیڑھی خدا نال رابطہ کرݨ دا ھک وݙا ذریعہ اے۔انہاں آکھیے اساں کتاب دے وجود دا انکار کروں تاں اساں خدا دے وجود دا انکار کریسوں کیوں جو خدا نال کمیونیکیشن دا واحد ذریعہ کتاب اے۔انہاں آکھیے اڄ کل دے جدید ٹیکنالوجی دے دور اچ جتھاں طالب علم کتاب توں دور تھیندے ویندن اساں آکھسوں او کتاب دی اہمیت کوں سمجھن۔ انہاں آکھیے خدا آپݨے لوکاں کوں مخاطب کرسانڳے وی کتاب دا سہارا ڳھدے تے ھک کتاب کوں وسیلہ بݨائے۔ انہاں آکھیے اساں علم دے جیڑھے راز ہن انہاں کوں سمجھݨا چاہندوں تاں کتاب نال جڑںا پوسی اینکوں پڑھݨا پوسی۔ جے نینگراں کوں اڳوں ودھݨا اے ترقی کرݨی اے تاں انہاں کوں کتاب نال یاری لاوݨی پوسی۔
