ساوݨ سیزن 2024 اچ اداریں وچال رابطہ کاری موثر بݨاوݨ سانڳے ڈیزاسٹر رسپانس کمیٹی دا اجلاس

اسلام آباد۔8جولائی(اے پی پی) وزیر اعظم دی طرفوں بݨائی ڳئی ڈیزاسٹر رسپانس کمیٹی دا پہلا اجلاس نیشنل ڈیزاسٹر مینجمنٹ اتھارٹی (این ڈی ایم اے) ہیڈ کوارٹرز اسلام آباد اچ تھیا ۔ نیشنل ڈیزاسٹر مینجمنٹ اتھارٹی دی طرفوں جاری بیان موجب کمیٹی وفاقی اتے صوبائی متعلقہ اداریں وچال قدرتی آفتاں نال نبݨݨ دیاں کوششاں خاص طور تے ساوݨ دے موسم تے ایندے نال جڑیے خطرے دے تناظر اچ جڑت یقینی بݨاوݨ سانڳے بݨائی ڳئی اے ۔ اجلاس دا مقصد ساوݨ متعلق آوݨ آلے ہنگامی حالات نال نبݨݨ سانڳے فعال ردعمل دے منصوبیں سانڳے لائحہ عمل تے ڳالھ مہاڑ کرݨ ، تیاریاں دا جائزہ گھنݨ ،وسائل دی ونڈ ، ویلھے توں پہلے چتاوݨی نظام تے کمیونٹی کوں تیاری دے مرضے اچ رلاوݨ ہئی ۔کمیٹی دے ارکان ہنگامی منصوبیں دا وی جائزہ ڳھدا جنہاں اچ اداریں وچال رابطہ کار ی کوں موثر بݨاوݨ ، سانجھیاں تربیتی مشقاں کراوݨ تے تکڑے ردعمل یقینی بݨاوݨ سانڳے خطرے توں ݙو چار علاقیں اچ وسائل دی تعیناتی شامل ہئی۔ چیئرمین این ڈی ایم اے لیفٹیننٹ جنرل انعام حیدر ملک شرکاء کوں این ڈی ایم اے دے نیشنل ایمر جنسی آپریشن سینٹر دی طرفوں ساوݨ دے موسم بارے پیش گوئی تے بریفنگ ݙتی تے آکھیے ڈیزاسٹر رسپانس کمیٹی دا قیام ساݙے قومی ڈیزاسٹر مینجمنٹ فریم ورک کوں موثر اتے مستحکم بݨاوݨ دے پاسے ھک اہم قدم اے ، جیویں جو ساوݨ دا سیزن شروع تھی چکیے تاں اے ضروری اے جو اساں وی ممکنہ ہنگامی صورتحال نال نبݨݨ سانڳے چنڳی طرح تیار ہیسے ۔ انہاں ساوݨ دے ہنگامی حالات سانڳے سٹاک پوزیشنز دا جائزہ گھنݨ دی اہمیت تے زور ݙتا جیڑھا جو آفتاں دی صورت اچ بنیادی اقدامات کرݨ سانڳے ضروری اے۔ وزارت منصوبہ بندی، ترقی اتے خصوصی اقدامات دے وزیر احسن اقبال بطور کمیٹی کنوینر اجلاس دی صدارت کیتی تے آفتاں نال نبݨݨ سانڳے تکڑی تے موثر نقطہ نظر دی اہمیت تے زور ݙتاانہاں ساوݨ دے مینھ پاروں کہیں وی ہنگامی صورت حال تے وختی موثر ردعمل یقینی بݨاوݨ سانڳے وفاقی تے صوبائی حکام سودھے سارے متعلقہ سٹیک ہولڈرز وچال تکڑی جڑت تے زور ݙتا ۔ اجلاس اچ این ڈی ایم اے، وزارت منصوبہ بندی، ترقی تے خصوصی اقدامات دے سینئر حکام، صوبائی ڈیزاسٹر مینجمنٹ اتھارٹی، فلاحی اداریں دے نمائندیں تے ٻئے معاون اداریں شرکت کیتی۔ ۔ڈیزاسٹر رسپانس کمیٹی دی نگرانی تے پیش آندے مسئلیں دے حل سانڳے باقاعدگی نال میٹنگ تھیندی رہی این ڈی ایم اے مرکزی رابطہ کار ادارے دے طور تے انہاں کوششاں کوں سوکھا بݨاوݨ تے اے ڳالھ یقینی بݨاوݨ اچ اہم کردار نبھیسی جو سبھے اقدامات قومی آفتاں نال نبݨݨ دی پالیسی موجب ہوون