اسلام آباد۔30جولائی(اے پی پی)وفاقی وزیر قومی خوراک و تحقیق رانا تنویر حسین زراعت اچ جدید ٹیکنالوجی دے استعمال کیتے ماہرین اتے سٹیک ہولڈرز تے مشتمل ٹاسک فورس ٻݨاوݨ دا عزم کیتے تاں جو فصلاں دی پیداوار ودھائی ونڄے۔ او اسلام آباد اچ ” پاکستان دی زراعت دی تبدیلی: چیلنجز وچال پائیدار ترقی اتے جدید زراعتی ٹیکنالوجیز دا کردار ” بارے تھیوݨ آلی گول میز کانفرنس نال خطاب کریندے پئے ہن۔ اے کانفرنس پالیسی ادارہ برائے پائیدار ترقی(ایس ڈی پی آئی ) اتے فیڈریشن آف ایوان ہائے صنعت وتجارت (ایف پی سی سی آئی) کٹھے کروائی اے۔ رانا تنویر حسین آکھیا جو زراعت دا شعبہ ملک دی معیشت دی ریڑھ دی ہڈی اے، زرعی شعبے دی ترقی اتے پیداوار ودھاوݨ کیتے جدید ٹیکنالوجی اتے جدتوں اپناوݨ دی لوڑھ اے، ایس ڈی پی آئی اتے ایف پی سی سی آئی کساناں دی تربیت اتے وسائل سانڳے وزارت قومی خوراک اتے تحقیق کوں پالیسی تجاویز ݙیوݨ، ایں شعبے کوں جدت ݙیوݨ لو ماہرین اتے مقامی کساناں وچال فاصلے ڳھٹاوݨ ٻہوں ضروری اے۔ انہاں آکھیا جو وزیراعظم زراعت کوں اپݨی اڳونہی ترڄیح سمڄھدن اتے حکومت نوجواناں کوں جدید زرعی ٹیکنالوجیز دی تربیت کیتے چین بھیڄݨ کیتے فنڈز ݙیندہ پئی اے۔
