اسلام آباد۔31جولائی(اے پی پی)وزیراعظم محمد شہباز شریف آکھیے جو حکومت انٹر نیٹ دی تیز تر اتے بغیر رکاوٹ فراہمی کیتے ودھ کم کریندی پئی اے۔ او اسلام آباد اچ ایشیا انٹرنیٹ کولیشن دے 3 رکنی وفد نال ملݨ ویلھے الیندے پئے ہن جیندی اڳواݨی مینجنگ ڈائریکٹر ایشیا انٹرنیٹ کولیشن جیف پئین کیتی۔ انہاں ڈیٹا دے تحفظ، انٹر نیٹ مواد بارے ضابطہ اخلاق اتے الیکٹرانک جرائم روکݨ دی حکمت عملی تے الایا۔ وزیر اعظم آکھیا جو پاکستان اچ انفارمیشن ٹیکنالوجی انفراسٹرکچر اچ بیرونی سرمایہ کاری متوجہ کرݨ کیتے حکمت عملی تے کم تھیندا پئے، حکومت مصنوعی ذہانت آلے بنیادی ڈھانچے دی ترقی اچ ردھی ہوئی اے اتے مصنوعی ذہانت انفراسٹرکچر بارے پاکستان کوں خطے دا اڳونہا ملک ٻݨاوݨ کیتے پرعزم ہیں، حکومت دے ڈیجیٹل پاکستان انیشی ایٹو دے تحت سارے نظام کوں ڈیجیٹلائز کیتا ویندا پئے، فیڈرل بورڈ آف ریونیو دی ڈیجیٹلائزیشن معیشت کوں ڈیجیٹل خطوط اتے خود کار نظام سانڳے وݙی پیش رفت ہوسی۔ وزیراعظم پاکستان اتے ایشیا پیسفک ریجن اچ انفارمیشن ٹیکنالوجی و انٹر نیٹ انفراسٹرکچر دےو دھارے کیتے ایشیا انٹرنیٹ کولیشن دی خدمات دی تعریف کیتی۔ وفد ایشیا انٹرنیٹ کولیشن دے پاکستان اچ انفارمیشن ٹیکنالوجی دے شعبے اچ جاری سروسز دا ݙسایا۔ ایں موقع تے وزیر مملکت برائے انفارمیشن ٹیکنالوجی و ٹیلی کام شزا فاطمہ، تانیہ ادروس اتے متعلقہ اعلیٰ سرکاری افسران وی موجود ہن۔
