اسلام آباد۔31جولائی(اے پی پی) وفاقی وزیر تعلیم و پیشہ وارانہ تربیت ڈاكٹر خالد مقبول صدیقی اسلام آباد دے سیكٹر ایچ نائن فور اچ پاكستان ایجوكیشن انڈومنٹ فنڈ (پیف) دی نویں عمارت دا افتتاح کر ݙتے۔ تقریب اچ وفاقی سیكرٹری تعلیم محی الدین وانی ،سی ای او پیف سیدہ ہاجرہ سہیل،سی ایس مراد شعیب،منیجر سكالرشپ مجید آصف شیخ،منیجرایم آئی ایس مظہرعامر،پیف بورڈ ممبر تے ٻئے شریک ہن ۔افتتاحی تقریب توں پہلے وفاقی وزیر پیف دی شجركاری مہم اچ عمارت دے صحن اچ ٻوٹا رادھا ۔ پیف دی طرفوں شجركاری مہم دے پہلے مرحلے اچ 50 توں ودھ ٻوٹے رادھے ڳئن ۔ وفاقی وزیر ادارے دے مختلف شعبیں دا معائنہ کیتا تے نویں عمارت اچ موجود ڈے كیئرسنٹرتے لا ئبریری دا وی دورہ كیتا۔سی ای او پیف سیدہ ہاجرہ سہیل وفاقی وزیر كوں ادارے دے مختلف سكالرشپ پروگرام تے بریفنگ ݙتی۔ تقریب توں خطاب اچ ڈاكٹر خالد مقبول صدیقی آکھیے تعلیم دے شعبہ سانڳے خصوصی اقدامات کیتے ویندے پئن ، تعلیم و تربیت دے ودھارے دی مداچ مختص فنڈز ودھاوئے ڳئن جیں دے چنڳے نتیجے سامݨے آندے پئن ۔ انہاں پیف دی طرفوں ہونہار تے ضرورت مند غریب طالبیں کوں سكالر شپ ݙیوݨ دی تعریف کیتی۔ ڈاكٹر خالد مقبول آکھیے نینگراں سانڳے جدید خطوط تے تعلیم خاص كر پیشہ وارانہ تربیت ݙیوݨ ویلھے دی لوڑھ اے۔ نینگراں کوں جدید علوم اچ فنی تربیت ݙے تے ملک دی معیشت اچ آپݨا کردار نبھاوݨ دے قابل بݨایا ونڄ سڳدے ۔ پیف دی طرفوں سیاحت ، صحت ،كلائمیٹ چینج ،آئی ٹی اتے آرٹیفیشل انٹیلی جنس دے شعبیں اچ سكالرشپ ݙیوݨ بہترین اقدام ہن۔ سی ای او پیف سیدہ ہاجرہ سہیل ݙسائے پاكستان ایجوكیشن انڈومنٹ فنڈ ملک توں غربت اتے بیروزگاری مکاوݨ دے عزم نال میدان وچ اے ۔ اساں نینگر خاص کر غریب طالبیں کوں معیاری تعلیم ݙے تے انہاں کوں باعزت روزگار کماوݨ دی جدوجہد اچ مصروف ہیسے ہݨ تئیں پیف 14 ہزار توں ودھ طالبیں کوں سكالر شپ ݙے چکیے ۔ اے نینگر نہ صرف اندرلے ملک روزگار دے موقع گھندے پئن بلکہ ٻاہرلے ملک ونڄ تے ملک تے قوم دا ناں اُچا کیتی کھڑن
