اسلام آباد۔7اگست (اے پی پی) وزیراعظم دے کوآرڈینیٹر برائے قومی صحت ڈاکٹر ملک مختار احمد بھرتھ بلوچستان توں مسلسل پولیو کیسز رپورٹ تھیوݨ تے تشویش کریندیں ہوئیں آکھیا جو پولیو دی موجودگی ملک اچ ہر ٻال کیتے خطرہ اے اتے پولیو اتے ٻئی ویکسینز دی اہمیت کوں اجاگر کریندی اے۔ قلعہ عبداللہ اچ 11 مہینے دے ٻال اچ پولیو وائرس دی تصدیق تھئی اے۔ بدھ کوں وزارت صحت توں جاری بیان موجب ڈاکٹر ملک مختر احمد بھرتھ آکھیا جو بلوچستان دے ضلع قلعہ عبداللہ اچ ہک 11 مہینے دا ٻال پولیو وائرس پاروں معذور تھی ڳئے جئیں دے بعد ملک اچ ایں سال پولیو کیسز دی تعداد 13 تھی ڳئی اے۔ انہاں آکھیا جو بلوچستان توں مسلسل پولیو کیسز رپورٹ تھیوݨ تشویش دی ڳالھ اے۔ انہاں آکھیا جو ٻالاں کوں ایں موذی مرض توں بچاوݨ حکومت دی پہلی ترجیح اے۔
