صدر آصف علی زرداری، ارشد ندیم کوں ہلالِ امتیاز ݙتے، 10 کروڑ روپے انعام دا اعلان

اسلام آباد۔29اگست(اے پی پی)صدر مملکت آصف علی زرداری پیرس اولمپکس 2024 اچ مرداں دے جیولن تھرو اچ شاندار کارکردگی اتے اولمپک گولڈ میڈل جیتݨ تے ارشد ندیم کوں ہلال امتیاز ݙتے اتے 10 کروڑ روپے انعام ݙیوݨ دا وی اعلان کیتے۔ ارشد ندیم کوں ہلال امتیاز ݙیوݨ دی تقریب ایوان صدر اسلام آباد اچ تھئی۔ تقریب اچ چیئرمین سینیٹ سید یوسف رضا گیلانی، وفاقی وزرا، اراکین پارلیمنٹ، غیر ملکی سفیراں، مختلف کھلاڑیاں، سابق اولمپیئنز و آفیشلز اتے سول و عسکری حکام شرکت کیتی۔ بعد اچ صدر مملکت آصف علی زرداری نال ارشد ندیم ملین۔

ملاقات اچ ارشد ندیم دے کوچ سلمان اقبال بٹ، سیکرٹری وزارت بین الصوبائی رابطہ ندیم ارشاد کیانی، ڈائریکٹر جنرل پاکستان سپورٹس بورڈ محمد یاسر پیرزادہ اتے اعلیٰ سرکاری افسران وی موجود ہن۔ صدر مملکت آصف علی زرداری،ا رشد ندیم کوں ملک دا ماݨ ودھاوݨ تے مبارک ݙیندے آکھیے جو ارشد ندیم اولمپک ریکارڈ ٻݨا تے ملک دا سر اچا کیتے، ارشد ندیم دی شاندار کامیابی، مسلسل محنت اتے لگن قابل تعریف اے، ارشد ندیم نوجواناں کوں رکاوٹاں پار کریندے ہوئے عالمی سطح تے کھیݙاں دے میدان اچ سنڄاݨ ٻݨاوݨ دا حوصلہ ݙتے، امید اے او اڳو تے وی ایویں محنت نال ملک دا ماݨ ودھیسن۔ صدر مملکت پاکستان اچ ٻئے کھیݙاں دے ودھارے کیتے اقدامات تے زور ݙیندے آکھیے جو کھلاڑیاں دے ٻالاں کوں اسکالر شپ ملݨے چاہیدن، کھلاڑیاں دی بہتری کیتے سندھ حکومت کوں پاکستان اسپورٹس بورڈ دے انڈومنٹ فنڈ اچ 250 ملین روپے دا حصہ پاوݨ دا آکھساں۔