وزیراعلی پنجاب دی اڳواݨی اچ صوبائی کابینہ دا اجلاس، پنجاب اتے اسلام آباد دے بجلی بلاں اچ ریلیف دی منظوری

لاہور۔29اگست(اے پی پی)وزیراعلی پنجاب مریم نوازشریف دی اڳواݨی اچ صوبائی کابینہ دا 14 واں اجلاس لاہور اچ تھئے جیندے اچ پنجاب اتے اسلام آباد دے صارفین کوں بجلی دے بلاں اچ ریلیف دی منظوری ݙتی ڳئی۔ اجلاس اچ وزیر اعلی آکھیا جو 46 ارب روپے نال عوام کوں بجلی دے بلاں اچ ریلیف دا کریڈٹ قائد محمد نوازشریف کوں ملݨا چاہیدے، ایں سانڳے وزیراعظم محمد شہبازشریف وی پورا ہتھ ونݙائے، تیکھے سولر پینل پروگرام شروع تھی ویسی، آندیاں گرمیاں اچ بجلی دے بل اچ ریلیف ݙیوݨ کتیے کم ہݨ توں ہی شروع کر ݙتے، اپݨا وعدہ پورا کرݨ تے اللہ تعالیٰ دا شکر کریندی ہاں، اے ریلیف کہیں تے احسان نئیں حق اے ڄیڑھا عوام تئیں پچائے، کم کرݨ آلیاں اتے ڳالھیں کرݨ آلیاں اچ ایہو فرق ہوندے، اساں عوام دا پورا ساتھ نٻھیسوں۔ پنجاب اتے اسلام آباد دے صارفین کوں اگست اتے ستمبر دے بلاں اچ 14 روپے فی یونٹ ریلیف ݙتا ویسی، حکومت پنجاب دے ریلیف نال 20 لکھ بجلی دے بل ادائیگی کیتے صارفین کون مل چکین، ہر بل تے حکومت پنجاب دی سبسڈی اتے واجب الادا رقم دا لکھیا ہوئے۔ کابینہ پنجاب دی پہلی جامع کلائمیٹ ریزلینٹ پنجاب ویژن اینڈ ایکشن پلان 2024 دی دی وی منظوری ݙتی۔ سینئر وزیر مریم اورنگزیب کلائمیٹ رزلینٹ پنجاب ویژن اینڈ ایکشن پلان 2024 تے بریفنگ ݙتی۔ صوبائی کابینہ پنجاب زکوۃ  و عشر کونسل ٻݨاوݨ، پنجاب بیت المال ایکٹ 1991ء دے تحت موجودہ پنجاب بیت المال کونسل تحلیل کرݨ اتے نویں بیت المال کونسل ٻݨاوݨ دی وی منظوری ݙتی۔ اجلاس لاہور اچ اکھیں دے علاج کیتے الشفا ہسپتال کوں سرکاری اراضی لیز تے ݙیوݨ دی منظوری ݙتی ڳئی۔