جیڑھے ریاست کوں نی منیندے او بندوق چیندن او دہشت گرد ہن ، بلوچستان اچ کوئی آپریشن نی تھیندا پیا ،محسن نقوی

اسلام آباد۔30اگست (اے پی پی) وفاقی وزیر داخلہ محسن نقوی آکھیے بلوچستان اچ کوئی آپریشن نی تھیندا پیا ، 26 اگست دا واقعہ معمولی واقعہ کائنی، اساکوں پتہ اے ایندے پچھوں کون اے ، اے ایس سی او سربراہ کانفرنس کوں سبوتاژ کرݨ دی سازش اے جیڑھے لوک ریاست کوں منیندن انھاں کوں آپݨے سر تے ٻلہیسوں لیکن جیڑھے ریاست کوں نی منیندے بندوق چیندن او دہشت گرد ہن، اساں انھاں دا بندوبست کریسوں ۔ سینیٹ اجلاس اچ بلوچستان دی صورتحال تے مختلف ارکان دے اعتراض دے نکتے دا جواب ݙیندے وزیر داخلہ آکھیے نیشنل ایکشن پلان تے عملدرآمد سانڳے جیڑھے فیصلے تھئے ہن ایپکس کمیٹی انھاں دا جائزہ گھندی اے تے صوبیں تے متعلقہ اداریں نال کوارڈینیشن کریندی اے ، پارلیمنٹ سپریم اے تے سپریم رہسی ایں تے کہیں کوں شک نی ہووݨا چاہیدا ، انھاں آکھیے بلوچستان اچ کوئی آپریشن نی تھیندا پیا ، کل وزیراعظم کوئٹہ اچ موجود ہن سارے سٹیک ہولڈرز نال انھاں دی ملاقات تھئی اے تے انہاں توں صلاح وی ڳھدی ڳئی ۔ انھاں آکھیے جیڑھے لوک ریاست پاکستان کوں منیندن انھاں کوں آپݨے سر تے ٻلہیسوں او اساں کیتے محترم ہن انھاں نال اختلافات وی تھی سڳدن ، انھاں اختلافات کوں مکاوݨ دی کوشش پہلے وی کریندے رہیوں اڳوں وی کریسوں لیکن جیڑھے ریاست کوں نی منیندے او بندوق چیندن او دہشت گرد ہن اساں انھاں دا بندوبست کریسوں ۔ بالکل واضح ہووݨا چاہیدے تے اساکوں کٹھا تھیوݨا چاہیدے جیڑھا ریاست دے خلاف ویسی ایندے خلاف اساں سارے کٹھے تھیسوں ۔وزیر داخلہ آکھیے جتھاں بلوچستان دے مسئلیں دی ڳالھ اے وزیراعظم سی ٹی ڈی سانڳے 5 ارب روپے مختص کیتن ، ہر ڈویژن سانڳے ھک ھک ارب روپے رکھئے ڳئن جیڑھے مقامی ایم پی اے، ایم این ایز نال رل تے لوکاں دے مقامی مسئلے حل کیتے ویسن ۔ انھاں آکھیے صوبے اچ وفاقی حکومت دے افسراں دی کمی اے ، ایں سلسلے اچ ھک پالیسی دا اعلان کیتا ڳئے افسراں دی تعیناتی کیتی ویسی ۔ وزیر داخلہ آکھیے او پہلے وی بلوچستان دا دورہ کر چکئن ، ھک درجن توں ودھ فیصلے تھئن چھوٹے چھوٹے مسئلے حل کرݨ دی کوشش کیتی اے ، 26 اگست دی رات جیڑھا واقعہ تھئے اے معمولی واقعہ کائنی ایندی باقاعدہ منصوبہ بندی کیتی ڳئی دہشت گرد تنظیماں رل تے اے دہشت گردی کیتی اے ، وزیر دفاع وی واضح کر چکئن اساکوں بالکل پتہ اے جو ایندے پچھوں کون اے ، ایس سی او کانفرنس کوں سبوتاژ کرݨ دی پلاننگ کیتی ڳئی اے کیوں جو ٻہوں عناصر کوں ایندی تکلیف اے، اے ایندے خلاف وی وی ھک سازش اے۔ انہاں آکھیے اساں کوشش کریسوں سارے پولیٹیکل سٹیک ہولڈرز کوں اعتماد اچ گھنوں ۔ ایندے توں پہلے سینیٹر جان محمد، سینیٹر بلال احمد خان، سینیٹر زرقا سہروردی تیمور اتے سینیٹر کامران مرتضیٰ وی ڳالھ مہاڑ کیتی