اسلام آباد۔26فروری (اے پی پی) وزیر اعظم دی کوآرڈینیٹر برائے موسمیاتی تبدیلی اتے ماحولیاتی رابطہ رومینہ خورشیدعالم موسمیاتی تبدیلی کوں وݙا چیلنج قرار ݙیندیں ہوئیں آکھیا جو پاکستان ماحول دوست اقدامات تے عمل کریندا پئے، پاکستانی قوم موسمیاتی تبدیلی دا بہادری نال مقابلہ کریندی پئی اے۔ اے ڳالھیں انہاں بدھ کوں تقریب توں خطاب کریندیں ہوئیں آکھی۔ رومینہ خورشیدعالم آکھیا جو پلاسٹک سیکٹر دا جی ڈی پی اچ 15 فیصدحصہ اے، پلاسٹک پاروں اساݙا ماحول متاثر تھیندا پئے۔ ہر ݙینھ دی بنیاد تے اساں پلاسٹک استعمال کریندے پئیوں جو ماحول کوں زہر آلود کریندا پئے۔ وزیراعظم دی کوآرڈینیٹر برائے موسمیاتی تبدیلی اتے ماحولیاتی رابطہ آکھیا جو ملک اچ پائیدار صنعت چلاوݨ کیتے اقدامات کرݨے پوسن۔
