لاہور۔26فروری(اے پی پی) الیکشن کمیشن سیکرٹریٹ پنجاب اچ بلدیاتی انتخابات کراوݨ متعلق چیف الیکشن کمشنر سکندر سلطان راجہ دی سربراہی اچ الیکشن کمیشن دے فل بینچ کیس دی سماعت کیتی۔پنجاب گورنمنٹ دی طرفوں چیف سیکرٹری پنجاب اتے سیکرٹری لوکل گورنمنٹ پنجاب الیکشن کمیشن دے سامݨے پیش تھئے ۔سماعت توں پہلے چیف الیکشن کمشنر ریمارکس ݙتن جو آئین دے آرٹیکل 140(A)(2) 219(d)اتے الیکشنز ایکٹ دی دفعہ219 دے تحت الیکشن کمیشن وفاق تے صوبیں اچ لوکل گورنمنٹس انتخابات کراوݨ دا پابند اے۔انہاں آکھیے بدقسمتی نال کوئی وی صوبائی حکومت بلدیاتی انتخابات کراوݨ سانڳے تیار نی تھیندی ۔ جݙاں وی الیکشن کمیشن اپݨی تیاریاں مکمل کرگھندے تاں متعلقہ صوبائی حکومتاں قوانین اچ ترامیم کرݙیندن ،جئیں پارو الیکشن کمیشن کوں سارے الیکشن دا عمل ول شروع کرݨا پوندے ۔ترائے صوبیں تے کنٹونمنٹ اچ ٻہوں جدوجہد دے بعد الیکشن کمیشن بلدیاتی انتخابات کراوݨ اچ کامیاب تھئے ۔ وختی بلدیاتی انتخابات کراوݨ صوبیں دی ذمہ واری اے ۔سیکرٹری الیکشن کمیشن سماعت اچ الیکشن کمیشن دی معاونت کریندے ݙسائے جو مختلف اوقات اچ اوں ویلھے دی صوبائی حکومتاں صوبہ اچ پنج واری انتخابی قوانین بدالیے ۔ الیکشن کمیشن انتخابات سانڳے ترائے واری حلقہ بندیاں کیتن۔ݙو (2) دفعہ الیکٹورل گروپس دیEnlistment کیتی،ایں توں انڄ بلدیاتی انتخابات دے شیڈول ݙیوݨ دے باوجود صوبہ اچ لوکل گورنمنٹ انتخابات کراوݨ ممکن نہ تھی سڳیا ۔ سماعت اچ چیف سیکرٹری پنجاب الیکشن کمیشن کوں ݙسائے جو موجودہ صوبائی گورنمنٹ حکومت سنبھیندے ہی لوکل گورنمنٹ ایکٹ تے کم شروع کرݙتا ہئی ۔ کیوں جو سارے سٹیک ہولڈرز دا فیڈ بیک ضروری ہوندے ۔لہذا ہݨ لوکل گورنمنٹ ایکٹ دا حتمی مسودہ پنجاب اسمبلی اچ ضروری قانون سازی سانڳے بھجوا ݙتا ڳئے ،جیویں ہی قانون سازی دا عمل مکمل تھیندے تاں قانون دے تحت رولز وی بݨا ݙتے ویسن ۔صوبائی حکومت الیکشن کمیشن دی صوبہ اچ انتخابات کراوݨ سانڳے ہر قسم دی معاونت سانڳے تیار اے ۔الیکشن کمیشن واضح کیتے جو صوبائی حکومت پنجاب قانون سازی دا عمل مکمل کرے تاں جو الیکشن کمیشن قانون دے تحت وختی حلقہ بندی دا عمل شروع کرے تے صوبے اچ وختی انتخابات کراوݨ یقینی بݨایا ونڄ سڳے۔
