اسلام آباد۔27فروری (اے پی پی) لیبیا دے ٻیڑی حادثے اچ جاں بحق چھی پاکستانیاں دی میتاں وطن پڄ ڳئن ۔ وفاقی وزیر برائے ہاؤسنگ اینڈ ورکس میاں ریاض حسین پیرزادہ اسلام آباد ایئرپورٹ تے میتاں وصول کیتی۔ وزارت ہائوسنگ اینڈ ورکس دے ترجمان موجب ایں موقع تے وفاقی وزیر برائے ہاؤسنگ اینڈ ورکس آکھیا جو پںڄ فروری کوں تھیوݨ آلے سانحے اچ ملک دے کئی ٹبراں کوں سوگ اچ مبتلا کر ݙتے۔ او لواحقین دے ݙکھ اچ برابر دے شریک ہن۔ انہاں آکھیا جو حکومت ہر سطح تے متاثرین نال کھڑی اے۔ اساں متوفین دے جسد خاکی انہاں دے عزیزاں تئیں پڄاوݨ کیتے سارے انتظامات کیتن۔ ریاض حسین پیرزادہ آکھیا جو باقی جاں بحق تھیوݨ آلیاں دی میتاں وی جلدی واپس ڳھن امسوں۔ لیبیا اچ جیندے بچݨ آلے 37 پاکستانیاں دی وطن واپسی کیتے وی کوششاں جاری ہن۔ ہوائی اڈے تے مرحومین دے ٹٻراں دی سہولت کیتے ڈیسک ٻݨا ݙتا ڳئے جڈانجو جاں بحق تھیوݨ آلیاں دی میتاں کوں پشاور چا ونجݨ کیتے ایمبولینس دا بندوبست وی کیتا ڳئے۔ وطن واپسی آوݨ آلی میتاں اچ مصورحسین ولدشیر مہدی ضلع کرم ، شعیب علی ولد محمد علی ضلع کرم،محمد علی شاہ ولدعبداللہ شاہ اورکزئی، عابد حسین ولد محمد حسن،موصاب حسین ولد جمیل حسین اتے شعیب حسین ولد نور علی ضلع کرم شامل ہن۔
