اسلام آباد۔27فروری(اے پی پی) ابو ظہبی دے ولی عہد شہزادہ شیخ خالد بن محمد بن زید النہیان پاکستان دے سرکاری دورے تے اسلام آباد پُڄ ڳئن ۔ صدر مملکت آصف علی زرداری اتے وزیراعظم محمد شہباز شریف نور خان ایئربیس تے معزز مہمان دا پرتپاک استقبال کیتے۔ انہاں بھاکُل پاتے تے ھک ݙوجھے نال گرمجوشی نال ہتھ ملائے ۔ صدر مملکت آصف علی زرداری، وزیراعظم محمد شہباز شریف تے ابوظہبی دے ولی عہد وچال خوشگوار جملیں دا تبادلہ وی تھئے انہاں ھک ݙوجھے سانڳے خیر سگالی دے جذبے دا اظہار کیتے ۔ روایتی لباس اچ ݙو ٻالاں ابوظہبی دے ولی عہد کوں پُھل پیش کیتن ۔ ایں موقع تے نائب وزیراعظم و وزیر خارجہ محمد اسحاق ڈار اتے خاتون اول آصفہ بھٹو زرداری وی موجود ہن۔شیخ خالد بن محمد بن زید النہیان دے رلے اعلیٰ سطح دا ھک وفد وی پاکستان آئے جیں اچ وزرا ،اعلیٰ حکام اتے ممتازکاروباری شخصیات شامل ہن ۔ابوظہبی دے ولی عہد وزیراعظم محمد شہباز شریف دی دعوت تے پاکستان دا پہلا سرکاری دورہ کریندے پئن ۔انھاں دے استقبال سانڳے وفاقی دارالحکومت اسلام آباد کوں سوہݨا سڄایا ڳئے ،معزز مہمان دے رستے اچ خیرمقدمی بینرز اتے جھنڈے لاتے ڳئن ۔ پاکستان تے یو اے ای دے جھنڈے وٹھی نکے نکے ٻالاں معزز مہمان کوں خوش آمدید آکھیے ۔ابوظہبی دے ولی عہد دا دورہ پاکستان تے متحدہ عرب امارات وچال گھاٹے برادرانہ تعلقات کوں اجاگر کریندے تے ݙو پاسے اقتصادی شراکت داری کوں مزید مستحکم کرݨ دے سانجھے عزم کوں ظاہر کریندے ۔ دورے اچ ولی عہد پاکستان دی قیادت نال سانجھی دلچسپی دے امور تے ڳالھ مُہاڑ ، تاریخی رشتے کوں تکڑا بݨاوݨ تے اقتصادی و سرمایہ کاری اچ تعاون ودھاوݨ سانڳے ڳالھ مُہاڑ کریسن ۔ دورے اچ کثیر جہتی شعبیں اچ وݙی مدت تعاون سانڳے موجودہ مضبوط فریم ورک کوں تقویت ݙیوݨ سانڳے کئی معاہدیں تے مفاہمت دی یادداشتاں تے وی دستخط کیتے ویسن۔
