اسلام آباد۔28فروری(اے پی پی) وزیراعظم محمد شہبازشریف آکھیے پاکستان تے چین وچال خلائی تحقیق اچ تعاون دا سمجھوتہ پاک چین دوستی داھک نواں باب اے ،سمجھوتے توں ݙوہیں ملکاں وچال تکڑی یار ظاہر تھیندی پئی اے ،پاک چین اقتصادی راہداری دے عظیم منصوبہ دے ذریعہ پاکستان اچ وݙے منصوبے مکمل کیتے ڳئن ، سپارکو کوں پاک چین خلائی تعاون نال بھرپورطریقے نال فیدہ چاوݨا ہوسی ۔ اتھاں پاکستان تےچین وچال خلائی تحقیق اچ تعاون دے سمجھوتہ دی دستاویز دے تبادلے دے حوالے نال تقریب توں خطاب کریندے وزیراعظم آکھیے پاکستان تے چین وچال خلائی تحقیق اچ تعاون داسمجھوتہ پاک چین دوستی دا ھک نواں باب اے تے ایں توں ݙوہیں ملکاں دی تکڑی یاری ظاہر تھیندی پئی اے ، ایں سمجھوتے توں پہلے پاکستانی خلا بازاں کوں چینی خلائی سٹیشنتے ونڄݨ دی تربیت دے موقع ملسن ِ ایں سمجھوتے توں چینی حکومت دی طرفوں ٻئے شعبیں دے علاوہ خلائی تحقیق دے شعبہ اچ پاکستان نال تعاون کوں تکڑا کرݨ دی وی عکاسی تھیندی پئی اے ۔وزیراعظم آکھیے او چین دے صدر شی جن پنگ دے شکر گزارہن جنہاں نہ صرف ایں شعبے بلکہ 2015ء توں چین پاکستان اقتصادی راہداری تے تکھے عمل درآمد دی صورت اچ پاکستان نال تعاون تے ملکی معیشت کوں تکڑا بݨاوݨ اچ آپݨا کردار نبھائے۔ ایں عظیم منصوبے دے ذریعے پاکستان اچ وڈے وݙے منصوبے مکمل کیتے ڳئن ۔وزیراعظم آکھیے پاکستان اچ سپارکو دے ادارے دا قیام 1961ء اچ عمل اچ آیا ہئی مگر اساں ایں دا جائزہ گھنوں تاں ایں شعبے اچ اساں خاص ترقی نی کیتی ،پاکستان ہݨ چین نال ایں پروگرام کوں اڳوں ودھیندا پئے ۔ اساں نہ صرف ایں کوں کامیاب بݨاوݨے بلکہ لیڈرشپ تے محنت دے ذریعے آپݨے نینگراں سانڳے نویں رستے تے موقع ڳولݨ دے نال انہاں امنگاں کوں بارآور کرݨا ہوسی۔ وزیراعظم آکھیے سپارکو تے ایں حوالے نال وݙی ذمہ واری لڳدی اے ، سپارکو کوں ایں تعاون توں چنڳاں فیدہ چاوݨا ہوسی۔
