اسلام آباد۔28فروری(اے پی پی) سپیکر قومی اسمبلی سردار ایاز صادق ہنگری دے دورے تے ہنگری دے صدر تماس سلیوک نال ملاقات کیتی جیں اچ سانجھی دلچسپی دے امور تے ڳالھ مہاڑ کیتی ڳئی ۔ ہنگری دے صدر پاکستان دی خارجہ پالیسی دی تعریف کیتی۔ قومی اسمبلی سردار ایاز صادق ہنگری دے صدر، تماس سُلیوک نال ملاقات اچ آکھیے پاکستان آپݨی اصولی تے غیر جانبدار خارجہ پالیسی تے کاربند اے۔سپیکر سردار ایاز صادق پارلیمانی وفد دے رلے ہنگری دا دورہ کریندے پئن ۔ دورے دا مقصد ݙوپاسے تعلقات مستحکم بݨاوݨ تے ݙوہیں ملکاں وچال پارلمانی رابطے ودھاوݨے ہن ۔اے دورہ ݙوہیں ملکاں وچال سفارتی تعلقات دے 60 سال مکمل تھیوݨ تے موقع تے تھیندا پئے ۔سپیکر قومی اسمبلی تے پاکستان دے پارلیمانی وفد دا ہنگری دے تاریخی صدارتی محل، سینڈور پیلس اچ آوݨ تے پرتپاک استقبال کیتا ڳئے ۔ ملاقات اچ، سپیکر قومی اسمبلی سردار ایاز صادق اقوام متحدہ دی سلامتی کونسل دے انتخابات اچ ہنگری دی طرفوں پاکستان دی حمایت تے شکریہ ادا کیتے اتے ایں حمایت کوں ہنگری دی طرفوں پاکستان دے خارجہ پالیسی دے غیر جانبدارتے متوازن ہووݨ دا اعتراف قرار ݙتا۔ ۔ انہاں مزید آکھیے ہنگری دا سلامتی کونسل دے انتخابات اچ پاکستان دی حمایت ݙوہیں ملکاں دے تکڑے ݙوطرفہ تعلقات دی عکاسی اے۔سپیکر سردار ایاز صادق عالمی امور تے ہنگری دے آزادانہ مؤقف دی تعریف کیتی ۔ انہاں قومی مفادات دے تحفظ اچ ہنگری دی قیادت دی دانشمندی کوں قابل تحسین قرار ݙتا تے صدر تماس سُلیوک دے غیر جانبداری تے مبنی مؤقف دی تعریف کیتی۔ انہاں آکھیے ہنگری دا غیر جانبدار موقف عالمی جھیڑے کوں روکݨ تے امن تے استحکام یقینی بݨاوݨ اچ کلیدی حیثیت رکھیندے۔
