اسلام آباد۔10اپریل(اے پی پی) وفاقی وزیر تجارت جام کمال خان آکھیے پاکستان تے بیلاروس دیاں حکومتاں تجارتی رکاوٹاں کوں ہٹاوݨ تے نجی شعبے دی شمولیت کوں ودھارا ݙیوݨ سانڳے پرعزم ہن ،ٹیکسٹائل مشینری، زرعی پراسیسنگ، دواسازی، قابلِ تجدید توانائی، انفارمیشن ٹیکنالوجی اتے ای-کامرس جیھے شعبوں اچ ݙوہیں ملکاں سانڳے سرمایہ کاری دے موقع موجود ہن ۔ اے ڳالھ انہاں منسک اچ ݙوجھے پاکستان-بیلاروس بزنس فورم توں خطاب اچ آکھی ۔ اے فورم وزیراعظم پاکستان دے سرکاری دورہ بیلا روس دے موقع تے تھئے جئیں اچ ݙوہیں ملکاں دے اعلیٰ سرکاری حکام، کاروباری شخصیات اتے ٻئے اہم سٹیک ہولڈرز شرکت کیتی۔ وفاقی وزیر تجارت جام کمال خان فورم توں خطاب اچ پاکستان-بیلا روس تعلقات اچ تکھے ودھدے اشتراک تے روشنی پاتی۔انہاں اپݨے خطاب اچ بیلا روس دی حکومت خصوصاً وزیر توانائی ڈینس موروژ دا شکریہ ادا کیتے جنہاں ایں اہم تقریب دی میزبانی کیتی تے پاکستانی وفد دی بھرپور معاونت کیتی۔ اپݨے خطاب اچ جام کمال خان آکھیے ساݙی اتھاں موجودگی ھک ایجھے سفر دا حصہ اے جیڑھا جو ساݙے ݙوہیں ملکاں وچال فروغ پیندی شراکت داری کوں ظاہر کریندے ۔ انہاں ݙسائے نومبر 2024 اچ صدر بیلا روس دے تاریخی دورہ پاکستان دے بعد ݙو طرفہ تعلقات اچ نمایاں بہتری آئی اتے تعاون دے ٻہوں سارے معاہدیں تے دستخط تھئن ۔ انہاں آکھیے وزیر اعظم پاکستان دا اڄوکا دارہ ایں شراکت داری کوں مزید ودھارا ݙیوݨ دے عزم دی علامت اے۔وفاقی وزیر اڄوکے سال منسک اچ منعقدہ اٹھویں پاکستان-بیلا روس مشترکہ وزارتی کمیشن کوں ھک اہم سنگ میل قرار ݙتے جئیں تجارت، زراعت، تعلیم، ٹیکنالوجی اتے فارماسیوٹیکل جیھے شعبیں اچ تعاون دے نویں مواقع پیدا کیتن۔جام کمال خان ممکنہ تجارتی موقع تے ڳالھ کریندے مشترکہ منصوبیں سانڳے چند کلیدی شعبیں دی نشاندہی کیتی جنہاں اچ ٹیکسٹائل مشینری، زرعی پراسیسنگ، دواسازی، قابلِ تجدید توانائی، انفارمیشن ٹیکنالوجی اتے ای-کامرس شامل ہن۔انہاں پاکستان دی ٹریڈ ڈویلپمنٹ اتھارٹی تے بیلا روس چیمبر آف کامرس اینڈ انڈسٹری وچال اڄوکے تعاون دے معاہدے دا وی اعلان کیتے جئیں کوں انہاں تجارتی ودھارے تے شراکت داری سانڳے فعال پلیٹ فارم قرار ݙتا ۔جام کمال خان بیلا روسی سرمایہ کاراں کوں پاکستان دے اسپیشل اکنامک زونز اچ سرمایہ کاری دی دعوت ݙتی جیڑھے جو پرکشش مراعات اتے ترائے ارب توں ودھ آبادی تے مشتمل منڈیاں تئیں رساݙی ݙیندن۔
