منسک۔11اپریل(اے پی پی):پاکستان توں 1.5 لکھ توں ودھ تربیت یافتہ اتے ہنر مند نینگراں کوں بیلا روس بھیجا ویسی۔ اے فیصلہ وزیراعظم محمد شہباز شریف اتے بیلاروس دے صدر لوکو شینکا وچال بیلا روس دے ایوان آزادی اچ تھیوݨ آلی ݙوپاسے ملاقات اچ کیتا ڳئے ۔ وزیراعظم دفتر دے میڈیا ونگ توں جاری بیان موجب پاکستان توں ہنر مند اتے تربیت یافتہ نینگراں کوں بیلاروس بھجواوݨ دے حوالے نال لائحہ عمل وختی ترتیب ݙتا ویسی ۔ ملاقات اچ ݙوہیں رہنماواں اتفاق کیتے جو زرعی شعبے اتے زرعی مشینری دی تیاری دے حوالے نال مشترکہ طورتے کم کیتا ویسی ۔ ملاقات اچ الیکٹرک گاݙیاں ، بساں دی تیاری تے غذائی تحفظ دے شعبے اچ تعاون ودھاوݨ تے اتفاق کیتا ڳئے ۔ ݙوہیں رہنماواں دی ملاقات اچ دفاعی تعاون اتے بزنس ٹو بزنس تعاون ودھاوݨ دا اعادہ وی کیتے ۔ ملاقات اچ ݙوہیں رہنماواں وچال تجارت، سرمایہ کاری اتے علاقائی امور سودھے مختلف موضوعات تے ڳالھ مہاڑ کیتی ڳئی ۔ ݙوہیں رہنماواں پاکستان اتے بیلاروس وچال تعلقات دے سارے پہلواں اچ اڄوکی مثبت پیشرفت تے اطمینان دا اظہار کیتے ۔ ݙوہیں رہنماواں سانجھے فیدہ مند تعاون اتے اقتصادی و تجارتی تعلقات کوں مزید تکڑا بݨاوݨ دا عزم وی کیتے ۔ وزیراعظم محمد شہباز شریف آکھیے اسلام آباد اچ گزریل سال تھیوݨ آلے پاک-بیلاروس مشترکہ وزارتی کمیشن دے اٹھویں اجلاس اتے اڄوکے سال پاکستان توں بین الوزارتی وفد دے دورہ بیلاروس دے بعد ݙوہیں ملکاں اچ مختلف شعبیں اچ تعاون اچ چنڳی پیشرفت تھئی اے ۔ انہاں آکھیے پاکستان بیلاروس نال تعلقات کوں قدر دی نگاہ نال ݙیکھدے ۔ وزیراعظم بیلا روس اچ پر تپاک استقبال تے شاندار مہمان نوازی تے صدر لوکاشینکو دا شکریہ ادا کیتے۔
