منسک۔11اپریل(اے پی پی) وزیراعظم محمد شہباز شریف تے بیلاروس دے صدر الیگزینڈر لوکاشینکو ݙوہیں ملکاں وچال مختلف شعبیں اچ تعاون ودھاوݨ دے وسیع موقع کوں اجاگر کریندے ݙوپاسے تجارت اتے اقتصادی تعاون دے موقع توں حقیقی معنیں اچ فیدہ چاوݨ دا عزم کیتے ۔ وزیراعظم محمد شہباز شریف تے صدر الیگزینڈر لوکاشینکو ݙوہیں ملکاں وچال معاہدیں تے مفاہمت دی یادداشتاں دے تبادلے دے بعد سانجھی پریس کانفرنس توں خطاب کیتا ۔ ایں موقع تے نائب وزیراعظم / وزیر خارجہ سینیٹر اسحاق ڈار، وفاقی وزیر تجارت جام کمال خان، وفاقی وزیر اطلاعات و نشریات عطاء ﷲ تارڑ، وفاقی وزیر مواصلات عبدالعلیم خان، وزیراعظم دے معاون خصوصی طارق فاطمی سودھے ݙوہیں ملکاں دے وزرا اتے اعلیٰ حکام موجود ہن۔وزیراعظم محمد شہباز شریف آکھیے بیلاروس دی کمپنیاں کوں پاکستان اچ سرمایہ کاری دے موقع تے سازگار ماحول توں فیدہ چاوݨا چاہیدے ۔وزیراعظم پرتپاک استقبال تے بہترین میزبانی تے بیلاروس دی قیادت دا شکریہ کیتے۔ وزیراعظم بیلاروس دے دارالحکومت منسک دی خوبصورتی دی تعریف کریندے آکھیے ایں شہر دی جتنی وی تعریف کیتی ونڄے گھٹ اے ۔ انہاں آکھیے بیلاروس دے صدر پاکستانی وفد کوں آپݨے فارم ہاؤس تے سݙیے تے انہاں دی دعوت ھک فیملی ری یونین وانڳوں ہئی ۔وزیراعظم آکھیے سابق وزیراعظم محمد نواز شریف اتے بیلاروس دے صدر لوکا شینکو رل تے پاکستان اتے بیلاروس دی دوستی کوں پروان چڑھائے تے صدر الیگزینڈر لوکاشینکو دے 2015 دے دورہ پاکستان ایں دوستی کوں تکڑا بݨاوݨ اچ اہم کردار نبھائے ۔ وزیراعظم آکھیے ݙوطرفہ تعلقات دے حوالے نال ساݙی ڳالھ مہاڑ تھئی اے، ݙوہیں ملکاں وچال مختلف شعبیں اچ تعاون سانڳے مفاہمتی یادداشتاں دا تبادلہ تھئے، مفاہمتی یادداشتاں کوں معاہدیں اچ بدلݨ دی لوڑھ اے ۔ انہاں صدر الیگزینڈر لوکاشینکو دی بصیرانہ قیادت دی تعریف کریندے آکھیے انہاں دی قیادت اچ بیلاروس نمایاں ترقی کیتی اے ۔ وزیراعظم آکھیے ݙوہیں ملکاں وچال مختلف شعبیں اچ سرمایہ کاری دے بے پناہ موقع موجود ہن، بیلاروس دی کمپنیاں کوں پاکستان اچ سرمایہ کاری دے موقع اتے سازگار ماحول توں فیدہ چاوݨا چاہیدے ۔ وزیراعظم آکھیے پاکستان ھک زرعی ملک اے جئیں دی 65 فیصد آبادی دیہات اچ رہندی اے تے زراعت نال وابستہ اے، پاکستان اتے بیلاروس کوں زرعی اتے صنعتی شعبیں اچ ھک ݙوجھے دے تجربیں توں فیدہ چاوݨا چاہیدے۔ انہاں آکھیے بیلاروس دی زرعی آلات اتے مشینری اچ وی وݙی مہارت اے ، زرعی پیداوار ودھاوݨ سانڳے بیلاروس دا تعاون چاہندوں انہاں دے تجربیں توں فیدہ چیسوں ۔ وزیراعظم آکھیے پاکستان اچ کھرباں ڈالر دے معدنی ذخیرے موجود ہن ایں حوالے نال وی پاکستان اتے بیلاروس تعاون اتے شراکت داری کرسڳدن ِ۔ وزیراعظم پاکستان دی 1.5 لکھ ہنرمند افرادی قوت دی بیلاروس اچ کھپت سانڳے صدر لوکاشینکو دی دعوت دا شکریہ ادا کریندے آکھیے بیلاروس اچ رہݨ آلے پاکستانی ایں دی تعمیر و ترقی اچ اہم کردار نبھیسن تے غیر ملکی ترسیلات زر اچ ودھارا تھیسی ۔وزیراعظم آکھیے ݙوہیں ملکاں وچال ٹیکسٹائل دے شعبہ اچ بی ٹو بی تعاون ودھایا ویسی ۔ انہاں آکھیے پبلک ٹرانسپورٹ دے شعبہ اچ وی پاکستان بیلاروس توں فیدہ چیسی ۔ انہاں آکھیے تعلقات دے ودھارے دے حوالے نال مثبت پیشرفت باعث اطمینان اے۔ ایندے توں پہلے بیلاروس دے صدر الیگزینڈرلو کاشینکو وزیراعظم شہباز شریف دے دورہ بیلاروس دا خیرمقدم کریندے آکھیے بیلاروس پاکستان نال آپݨے تعلقات کوں بے حد اہمیت ݙیندے ، ݙوہیں ملکاں وچال مختلف شعبیں اچ تعاون دے ودھارے دے وسیع موقع موجود ہن، وزیراعظم شہباز شریف دے ایں دورے توں ݙو طرفہ تعلقات کوں نئی جہت ملسی ۔ انہاں پاکستان، بیلاروس بزنس فورم دے انعقاد کوں تجارت دے ودھارے سانڳے ٻہوں اہمیت دا حامل قرارݙیندے آکھیے ݙوطرفہ تجارت اتے اقتصادی تعاون دے موقع توں حقیقی معنی اچ فیدہ چاوݨا اے۔
