سیول ۔11اپریل(اے پی پی) چیئرمین سینیٹ سید یوسف رضا گیلانی کوں متفقہ طور تے بین الپارلیمانی سپیکرز کانفرنس دا بانی چیئرمین منتخب کرڳھدا ڳئے۔ سینیٹ سیکرٹریٹ توں جاری بیان موجب عالمی پارلیمانی سفارت کاری دے ھک تاریخی اتے انقلابی اقدام دے طور تے بین الپارلیمانی سپیکرز کانفرنس دا باقاعدہ آغاز جنوبی کوریا دے دارالحکومت سیول اچ تھئے ۔ افتتاحی اجلاس اچ پوری دنیا توں سینئر پارلیمانی رہنماواں، سپیکرز اتے چیئرپرسنز شرکت کیتی جیڑھا جو جمہوری اقدار، سانجھے تعاون اتےعالمی ترقی سانڳے آپݨی مشترکہ وابستگی دی علامت اے۔ایں کانفرنس دا ساریں توں اہم تے قابل فخر پہلو اے ہے جو چیئرمین سینیٹ سید یوسف رضا گیلانی کوں متفقہ طور تے آئی ایس سی دا بانی چیئرمین منتخب کرڳھدا ڳئے تے انہاں دی قائدانہ صلاحیتاں، بین الاقوامی تعلقات اچ تجربے اتے جمہوری اصولاں نال گہری وابستگی کوں عالمی سطح تے تعریف کیتی ڳئی ۔بین الپارلیمانی سپیکرز کانفرنس دے افتتاحی اجلاس توں خطاب اچ چیئرمین یوسف رضا گیلانی ایں اعزاز تے دلوں شکریہ ادا کریندے ایں بین الاقوامی پلیٹ فارم کوں عالمی پارلیمانی رابطے کوں تکڑا کرݨ دا ھک تاریخی سنگ میل قرار ݙتا۔چیئرمین سینیٹ آکھیے اے پلیٹ فارم نہ صرف بین الاقوامی پارلیمانی سفارت کاری دے ھک نویں باب دا آغاز اے بلکہ عالمی ہم آہنگی، مشترکہ خوشحالی اتے دیرپا امن دے پاسے ساݙے اجتماعی کردار کوں نویں سروں متعین کرݨ دا ھک تاریخی موقع وی اے۔ چیئرمین سینیٹ عالمی چیلنجز پاروں بین الاقوامی پارلیمانی قیادت کوں تکڑا تے بامقصد اقدام تے زور ݙتےجنہاں اچ ماحولیاتی تبدیلی، پاݨی دی قلت، توانائی دے متبادل ذرائع، معاشی ناہمواری اتے جھیڑیں دا پرامن حل شامل ہن ۔چیئرمین سینیٹ اپݨے خطاب اچ پکیاں تجویزاں پیش کیتن جنہاں اچ آبادی، پائیداری اتے وسائل دی برابر تقسیم تے مبنی خصوصی ٹاسک فورسز دا قیام،شفافیت، تعاون تے موثر حکمرانی سانڳے پارلیمانی تربیت دے عالمی نیٹ ورکس دی توسیع،اقوام متحدہ، مالیاتی اداریں تے ترقیاتی شراکت داراں دے نال حکمت عملی تے مبنی اشتراک، ڈائیلاگ اتے جھیڑیں دے حل سانڳے پارلیمانی فریم ورکس دی تشکیل اتے پائیدار طرز حکمرانی کوں رکن ملکاں دی پارلیماناں اچ ھک رہنما اصول دے طور تے اپناوݨ دی تحریک شامل ہن ۔ چیئرمین سینیٹ آکھیے بین الپارلیمانی سپیکرز کانفرنس محض پارلیمانی رہنماواں دا اجتماع کائنی بلکہ اے ساݙی مشترکہ خواہش دا زندہ ثبوت اے جو اساں افہام و تفہیم نال اڳوں ودھوں ، انسانی وقار کوں اُچا کرن تے عالمی ترقی سانڳے ھک مشترکہ رستہ طے کرن۔ بین الپارلیمانی سپیکرز کانفرنس دے اختتام تے ھک پروقارایوارڈز دی تقریب دا انعقاد کیتا ڳئے جئیں اچ چیئرمین سینیٹ یوسف رضا گیلانی بین الپارلیمانی سپیکرز کانفرنس دے 45 بانی ارکان سپیکرز کوں خصوصی اعزازات نال نوازیے ۔اے اعزازات انھاں رہنماواں دی خدمات، جمہوری استحکام، پارلیمانی تعاون اتے عالمی یکجہتی دے ودھارے اچ انہاں دے غیر معمولی کردار دے اعتراف دے طور تے پیش کیتے ڳئن۔ اے تقریب بین الپارلیمانی سپیکرز کانفرنس دی ایں بنیادی روح دی عکاس ہئی جیڑھا جو عالمی پارلیمانی سفارت کاری کوں انسانیت دی خدمت، پائیدار ترقی اتے امن عالم دے ودھارے سانڳے وقف کرݨ چاہندی اے ۔ چیئرمین سینیٹ سید یوسف رضا گیلانی دا بطور بانی چیئرمین بین الپارلیمانی سپیکرز کانفرنس متفقہ انتخاب پاکستان کوں عالمی سفارتی منظرنامے تے ھک قابل فخر مقام عطا کیتے۔ اے اقدام نہ صرف ملک دی جمہوری ساکھ کوں مزید مستحکم کریندے بلکہ پوری دنیا اچ پاکستان دے تعمیری اتے قائدانہ کردار کوں وی اجاگر کریندے۔
