لاہور۔12اپریل(اے پی پی) پراونشل ڈیزاسٹر مینجمنٹ اتھارٹی( پی ڈی ایم اے) صوبائی دارالحکومت لاہور سودھے پورے پنجاب اچ کل 13 اپریل توں زور دی گرمی پووݨ دا امکان ظاہر کیتے۔ترجمان موجب جنوبی پنجاب اچ درجہ حرارت معمول توں 6 توں 8ڈگری سینٹی گریڈ ودھ رہݨ جݙاں جو اُتلے پنجاب اچ 14توں 18اپریل درجہ حرارت معمول توں 4توں 6 ڈگری ودھ رہݨ دا امکان اے ۔ ریلیف کمشنر پنجاب نبیل جاوید صوبے دے کمشنرز تے ڈی سیز کوں الرٹ رہݨ دی ہدایت کیتی اے ۔ انہاں آکھیے ٻالاں ، تریمتاں تے بزرگ شہریاں کوں زور دی گرمی اچ احتیاط ورتݨی ہوسی ۔ڈی جی پی ڈی ایم اے عرفان علی کاٹھیا آکھیے رات ویلھے وی موسم معمول توں ودھ تتا رہݨ دی توقع اے گرمی دی شدت پاروں مٹی آلیاں ہوائیں/ اندھاری گھلݨ تے طوفان دا وی خطرہ اے ،کاشتکارفصلاں تے جانوراں دے تحفظ سانڳے وختی اقدامات کرن ۔ انہاں آکھیے ریسکیو 1122ہیٹ سٹروک اتے پاݨی دی کمی توں متاثرہ لوکاں دی مدد سانڳے الرٹ رہن تے شہری علاقیں اچ امدادی کیمپ، صاف پاݨی،او آر ایس اتے ابتدائی طبی امداد دیاں سہولتاں ݙیوݨ یقینی بݨاون جݙاں جو موبائل ہیلتھ ٹیماں ہیٹ سٹروک اتے پانی دی کمی دے کیساں نال نبݨݨ سانڳے تکڑے رہن ۔ انہاں مزید آکھیے گرمی دی شدت ودھݨ پاروں شمالی علاقیں اچ برف پگھلݨ دا عمل تھکا تھی سڳدے۔
