اسلام آباد۔12اپریل(اے پی پی) وفاقی دارالحکومت اسلام آباد /راولپنڈی سودھے ملک دے وکھو وکھ شہراں اچ 5.5 شدت زلزلے دے شدید جھٹکے محسوس کیتے ڳئن۔ ݙوپہر ساڈھے 12 وڄے دے نیڑے آوݨ آلے زلزلے دی شدت ریکٹر سکیل موجب 5.5 ریکارڈ کیتی ڳئی ۔ زلزلہ پیماہ مرکز موجب زلزلے دی جھکائی 12 کلو میٹر ہئی تے ایں دا مرکز راولپنڈی توں پرے 60 کلو میٹر شمال مغرب وچ ہئی ۔ جاڑے شہراں سودھے پشاور، صوابی ، سوات ، مانسہرہ ، ایبٹ آباد ، اٹک، منڈی بہاوالدین ، آزاد کشمیر سودھے وکھو وکھ شہراں اچ زلزلے دے جھٹکے محسوس کیتے ڳئن تے لوک کلمہ پڑھدے گھراں ، دفتراں تے عمارتاں توں ٻاہر نکل آئے ۔ ابتدائی اطلاعات موجب حالی تئیں کہیں جانی و مالی ضیان دی کوئی اطلاع نی ملی۔
