اسلام آباد۔13اپریل(اے پی پی) وفاقی وزیر داخلہ محسن نقوی نال امریکی ارکان کانگریس دے وفد اہم ملاقات کیتی اے ، وفد اچ کانگریس مین جیک برگ مین، ٹام سوزی اتے جوناتھن جیکسن شامل ہن۔ وزیر مملکت داخلہ طلال چوہدری، قائم مقام امریکی سفیر نٹالی بیکر اتے وفاقی سیکرٹری داخلہ خرم آغا وی ایں موقع تے موجود ہن ۔ ملاقات اچ ݙو پاسے تعلقات تے سانجھی دلچسپی دے امور تے تفصیلی ڳالھ مہاڑ کیتی ڳئی ۔ ݙوہیں پاسوں معیشت، تجارت اتے سرمایہ کاری دے شعبیں اچ تعاون ودھاوݨ تے ڳالھ مہاڑ کیتی ڳئی جݙاں جو سیکورٹی، انسداد دہشت گردی اتے بارڈر سیکورٹی تے وی تفصیلی ڳالھ مہاڑ کیتی ڳئی ۔ ایں موقع تے ڳالھ کریندے محسن نقوی آکھیے امریکہ نال تکڑے تے پائیدار تعلقات پاکستان دی خارجہ پالیسی اچ کلیدی حیثیت رکھیندن ۔ انہاں آکھیے 30 اپریل کوں امریکہ اچ پاکستان کاکس دا انعقاد خوش آئند پیشرفت اے۔ انہاں ایں ڳالھ تے زور ݙتے جو پاکستان دہشت گردی اتے باقی دنیا وچال دیواروانڳوں کھڑے ۔ انہاں زور ݙے تے آکھیے جو دہشت گردی ھک عالمی چیلنج اے اتے عالمی برادری کوں پاکستان نال بھرپور تعاون کرݨا چاہیدے انہاں ایں ڳالھ تے زور ݙتے جو انسداد دہشت گردی دے شعبے اچ انٹیلی جنس اتے ٹیکنالوجی دا اشتراک ٻہوں اہمیت رکھیندے۔ انہاں مزید آکھیے دہشت گردی دے خلاف پاکستان دی بے پناہ قربانیاں دی عالمی تناظر اچ کوئی مثال نی ملدی ۔ انہاں آکھیے امریکی ارکان کانگریس دا دورہ دہشت گردی دے خلاف جنگ اچ پاکستان دے بے مثال کردار کوں اجاگر کرݨ اچ اہم ہوسی۔وزیر داخلہ پاکستان منرلز انوسٹمنٹ فورم 2025 اچ امریکی وفد دی شرکت دا خیرمقدم کیتے۔ انہاں مزید آکھیے جو حکومت سرمایہ کاراں کوں ہر ممکن سہولتاں تے مکمل تحفظ یقینی بݨیسی ۔وزیر مملکت داخلہ طلال چوہدری آکھیے جون اچ اسلام آباد اچ تھیوݨ آلا انسداد دہشت گردی ڈائیلاگ انسداد دہشت گردی دے شعبے اچ سانجھے تعاون کوں ودھارا ݙیوݨ اچ کلیدی کردار نبھیسی ۔امریکی کانگریس دے وفد آکھیے دہشت گردی دے خلاف جنگ اچ پاکستان دے کردار کوں اجاگر کرݨ دی لوڑھ اے ۔ انھاں مزید آکھیے امریکہ اچ رہݨ آلی پاکستانی کمیونٹی باصلاحیت اتے محنتی اے۔
