اسلام آباد۔13اپریل(اے پی پی) وفاقی وزیر اطلاعات و نشریات عطاءاللہ تارڑ پاکستان اچ اوورسیز پاکستانیز کنونشن دے انعقاد کوں خوش آئند قرارݙیندے آکھیے اوورسیز پاکستانی ساݙے ملک دی شان تے ساݙے سراں دا تاج ہن، انہاں ٻاہرلے ملک محنت اتے جدوجہد دے ذریعے نہ صرف آپݨا بلکہ ملک دا ناں روشن کیتے، اے پاکستان دے ”واکنگ ٹاکنگ ایمبیسیڈرز“ ہن جیڑھے ترسیلات زر دے ذریعے ملک دی معیشت کوں تکڑا کریندے پئن ہݨ ویلھا آڳئے جو انہاں دی خدمات دا باقاعدہ اعتراف کیتا ونڄے ، انہاں کوں عزت تے مقام ݙتا ونجے ۔ ترائے ݙینھ وار اوورسیز پاکستانیز کنونشن دے حوالے نال خصوصی ڳالھ مہاڑ کریندے وفاقی وزیر اطلاعات و نشریات آکھیے اے پہلا موقع اے جو ایں سطح تے ٻاہرلے ملک رہݨ آلے پاکستانیاں کوں خراج تحسین پیش کرݨ سانڳے ھک شاندار کنونشن دا انعقاد کیتا ڳئے جئیں اچ انجینئرز، وکلا، ڈاکٹرز، صحافی اتے کاروباری حضرات سودھے مختلف شعبیں نال تعلق رکھݨ آلے اوورسیز پاکستانی شریک تھیندے پئن تے اے تقریب انہاں دیاں قربانیاں دی تعریف کرݨ دا ھک اہم موقع اے ، اوورسیز پاکستانیز پاکستان دے واکنگ ٹاکنگ ایمبیسیڈرز ہن جیڑھے اپݨے کردار، خدمات اتے ترسیلات زر دے ذریعے وطن عزیز دی معیشت کوں مستحکم کریندے پئن ، اوورسیز پاکستانیز تے ساݙے ایکسپورٹرز قابل تعریف ہن جیڑھے ترسیلات زر اتے ٻاہرلے ملک پاکستانی مصنوعات دی برآمدات توں زرمبادلہ دے ذخیرے اچ ودھارا تے ملک دی معاشی بہتری اچ اہم کردار نبھیندے پئن ۔ انہاں آکھیے اوورسیز پاکستانیز جتھاں وی وسدن او پاکستان سانڳے محبت اتے خلوص دا جذبہ رکھیندن ۔ حکومت پاکستان اوورسیز پاکستانیاں کوں قدر دی نگاہ نال ݙیکھدی اے تے انہاں دی فلاح بہبود کوں آپݨی ترجیح رکھیا ہویا اے ۔ ایں سلسلے اچ خصوصی سرمایہ کاری سہولت کونسل (ایس آئی ایف سی) وی اہم کردار نبھیندی پئی اے تاں جو ٻاہرلے ملک رہݨ آلے پاکستانیاں سانڳے سازگار ماحول ݙتا ونڄ سڳے ۔ وفاقی وزیر آکھیے کجھ عناصر ایجھے اقدامات توں ناخوش ہن تے منفی تاثر کھنڈاوݨ دی کوشش کریندے پئن لیکن اساکوں بطور قوم مثبت سوچ کوں ودھارا ݙیوݨا اے ، وزیراعظم شہباز شریف دی قیادت اچ گزریل ھک سال اچ معیشت اچ بہتری آئی اے، ”اُڑان پاکستان“ پروگرام دے تحت ترقی دا سفر جاری اے۔ عطاءاللہ تارڑ آکھیے انشاءاللہ پاکستان مزید ترقی کریسی ، خوشحال تھیسی تے اوورسیز پاکستانیاں کوں انہاں دا جائز مقام تے عزت ضرور ملسی۔
