لندن ۔13اپریل(اے پی پی) وزیرِاعظم محمد شہباز شریف آکھیے بیلاروس دی زراعت دے شعبے اچ مہارت توں فیدہ چیسوں ،اللہ تعالی پاکستان کوں معدنیات دے خزانے عطا کیتن ،ترقی کریندا ، خوشحالی دے پاسے تکھے ٹردا پاکستان انشاء اللہ ساݙی منزل اے ۔وزیراعظم دفتر دے پریس ونگ موجب اے ڳالھ وزیرِ اعظم محمد شہباز شریف لندن اچ صحافیاں کوں آکھی ۔ وزیراعظم آکھیے دورہءِ بیلاروس چنڳاں رہیے ،بیلاروس دی زراعت دے شعبے اچ مہارت توں فیدہ چیسوں ،بیلاروس اچ بݨݨ آلی زرعی مشینری دے جوائنٹ وینچرز پاکستان اچ بݨسن ۔ انہاں آکھیے اللہ تعالی پاکستان کوں معدنیات دے خزانے عطا کیتن ،بیلاروس اچ مائنز اینڈ منرلز دے حوالے نال مشینری بݨاوݨ آلی فیکٹری دا وی دورہ کیتے، ایں شعبے اچ وی انشاء اللہ تعاون ودھیسوں۔ انہاں آکھیے 1.5 لکھ ہنرمند پاکستانی نینگراں کوں بیلاروس اچ روزگار ݙیوݨ سانڳے بیلاروس نال ساݙی مفاہمت تھئی اے اساں انشاء اللہ افرادی قوت کوں میرٹ تے بھیجیسوں۔ وزیرِاعظم آکھیے پنجاب اسپیڈ جیڑھی ہئی او پاکستان سپیڈ ہئی جیڑھا ہݨ پاکستان سپر پاکستان اسپیڈ اے۔ انہاں آکھیے محمد نواز شریف دی قیادت اچ اساں قوم دی خدمت کریندے پیوں ،ترقی کریندا ، خوشحالی دے پاسے ودھدا پاکستان انشاء اللہ ساݙی منزل اے۔محمد شہباز شریف آکھیے اجتماعی کوششاں تے پوری قوم دیاں دعاواں نال ݙینھ رات محنت کرتے اے منزل انشاء اللہ گھنسوں۔انہاں آکھیے میں ہمیشہ آکھیے افغانستان ساݙا ھک ہمسایہ بھرا ملک اے اساکوں ہمسائے دے طور تے ہمیشہ رہݨا اے،اے اساں تے منحصر اے جو اساں چنڳے ہمسائے دے طور تے رہوں جھیڑے کروں ۔ وزیرِاعظم آکھیے افغان عبوری حکومت کوں اساں ٻہوں واری دے سنھیا ݙتے جو دوحہ معاہدے موجب او کہیں طور تے وی افغانستان دی سر زمین کوں دہشتگردی سانڳے استعمال تھیوݨ دی اجازت نہ ݙیسن لیکن بد قسمتی نال ٹی ٹی پی، آئی ایس کے پی تے ٻئے دہشتگرد تنظیماں اتھاں آپریٹ کریندن تے پاکستان دے بے گناہ لوکاں کوں انہاں شہید کیتے۔ وزیرِاعظم آکھیے میں سمجھداں جو اے قربانیاں جیڑھے پاکستان دے عوام، افواج پاکستان، پولیس تے ٻئے قانون نافذ کرݨ آلے ادارے ݙیندے پئن اے ضائع نہ ویسن ۔ وزیرِاعظم محمد شہباز شریف آکھیے افغانستان کوں میݙا ھک مخلصانہ مشورہ اے جو او وختی انہاں دہشتگرد تنظیماں کوں لگام پاوے تے آپݨی دھرتی کوں انہاں دے ہتھوں استعمال نہ تھیوݨ ݙیوے ۔ اڄ اوور سیز کنونشن دا آغاز تھی چکیے تے الحمدللہ اے وݙا ، تاریخی کنونشن تھیندا پئے ،اوورسیز پاکستانی اپݨے گھر پاکستان اچ آندے پئن ،ݙینھ رات محنت کرتے اورسیز پاکستانی، پاکستان دا ناں روشن کریندن تے ہر سال ارباں ڈالر دی ترسیلات زر بھجویندن اڄوکے سال اوورسیز پاکستانیاں دی بھجوائی ڳئی ترسیلات زر اچ ودھارا تھئے ۔ وزیرِاعظم محمد شہباز شریف آکھی کنونشن ٻاہرلے ملک رہݨ آلے پاکستانیاں نال ڳالھ مہاڑ کرݨ دا شاندار موقع اے،کنونشن اچ اووسیز پاکستانیاں دے جائز مطالبے غور نال سݨسوں تے انہاں تے جیویں تھی سڳیا تکھے عمل کریسوں۔
