اسلام آباد۔15اپریل (اے پی پی) وزیراعظم محمد شہباز شریف بلوچستان دے ضلع مستونگ دے علاقے شمس آباد اچ بلوچستان کانسٹیبلری دی ڳاݙی تے دہشتگرد حملے دی شدید مذمت کریندیں ہوئیں ترائے اہلکاراں دی شہادت تے افسوس کیتے اتے انسانیت دے دشمن دہشت گرداں دے عزائم کوں مٹی اچ ملاوݨ دا عزم کیتے۔ منگل کوں وزیر اعظم آفس دے میڈیا ونگ توں جاری بیان موجب وزیراعظم واقعے اچ شہید تھیوݨ آلے اہلکاراں کیتے بلندی درجات اتے لواحقین کیتے صبر دی دعا کیتی۔ وزیراعظم زخمیاں کوں فوری طبی امداد ݙیوݨ دی ہدایت وی کیتی۔ انہاں آکھیا جو انسانیت دے دشمن دہشت گرداں دے عزائم کوں مٹی اچ ملیسوں۔ ملک توں دہشت گردی دے خاتمے تئیں دہشت گرداں دے خلاف اساݙی جنگ جاری رہسی۔
