ڈیرہ غازی خان ۔ 16 اپریل (اے پی پی) وفاقی وزیر توانائی سردار اویس احمد خان لغاری اتے وفاقی وزیر ریلوے حنیف عباسی ڈیرہ غازی خان اتے ملتان وچال شٹل ٹرین دا افتتاح کرݙتے۔ بدھ کوں ڈیرہ غازی خان ریلوے اسٹیشن تے افتتاحی تقریب توں خطاب کریندیں ہوئیں وفاقی وزرا آکھیا جو شٹل ٹرین چلݨ نال ملتان، ڈیرہ غازی خان سودھے جنوبی پنجاب دے ٻئے شہراں دی عوام کوں بہترین سہولتاں ملسن۔ مسلم لیگ ن دی حکومت عوامی مسئلے جنگی بنیاداں تے حل کریندی پئی اے۔ ملک دی چووی کروڑ پاک فوج نال کھڑی اے۔ دہشت گرد بزدلانہ کاروائیاں نال اساݙی ترقی دا پندھ نی روک سڳدے۔ وزیر اعظم 7 روپے 41 پیسہ فی یونٹ بجلی سستی کرتے عوام کوں تحفہ ݙتے۔ افتتاحی تقریب توں خطاب کریندیں ہوئیں وفاقی وزیرتوانائی سردار اویس لغاری آکھیا جو اڄ ڈیرہ غازی خان دی عوام کیتے خوشی دا ݙینھ اے کیونجو اتھ کئیں ورھیں بعد ریلوے سٹیشن ولا بحال کیتا وینداپئے تے ریلوے سٹیشن تے موجود عوام دی وݙی تعداد ایں ڳالھ دی گواہی ݙیندی پئی اے جو مسلم لیگ ن دی حکومت جڈاں وی اقتدار اچ آئی اوں عوامی فلاحی منصوبیاں کوں ترجیح ݙتی اے۔
