اسلام آباد۔17اپریل (اے پی پی) وفاقی وزیر داخلہ محسن نقوی نال برطانیہ دے وزیر برائے فیتھ اینڈ کمیونیٹیز لارڈ واجد خان ملاقات کیتی جئیں اچ پاک برطانیہ تعلقات سودھے ݙو پاسہ امور ،انسداد دہشتگردی، سکیورٹی اتے کراس بارڈر جرائم دی روک تھام سودھے مختلف شعبیاں اچ تعاون ودھاوݨ بارے ڳالھ مہاڑ کیتی ڳئی۔ وزیر مملکت داخلہ طلال چوہدری، برطانوی ہائی کمشنر جین میریٹ اتے سیکرٹری داخلہ خرم آغا وی ایں موقع تے موجود ہن۔ وزیر داخلہ محسن نقوی آکھیا جو پاکستان برطانیہ نال آپسی فیدے دے سارے شعبیاں اچ ݙوپاسہ تعاون ودھاوݨ چاہندے۔ برطانوی وزیر لارڈ واجد خان جعفر ایکسپریس تے حملے دی مذمت کیتی اتے ایں واقعے اچ شہید تھیوݨ آلیاں دے ٹبراں نال تعزیت کیتی۔ برطانوی وزیر لارڈ واجد خان آکھیا جو دہشتگردی دے خلاف جنگ اچ پاکستان دی قربانیاں دی قدر کریندوں۔ لارڈ واجد خان افغان مہاجرین دی برطانیہ منتقلی اچ سہولت ݙیوݨ تے وزارت داخلہ دا شکریہ ادا کیتا۔
